രാജ്യത്തെ പെട്രോള് വില നൂറുരൂപ കടക്കുന്ന ആദ്യത്തെ മെട്രോ നഗരമായി മാറി മുംബൈ. കഴിഞ്ഞ ദിവസം 99.94 വരെ എത്തിയിരുന്നെങ്കിലും രാജ്യത്തിന്റെ സാമ്പത്തിക തലസ്ഥാനമായ മുംബൈയില് സെഞ്ച്വറി നേടിയിരുന്നില്ല.
എന്നാല് ഇന്ന് എല്ലാ റെക്കോര്ഡുകളും തകര്ത്തു കൊണ്ട് മുംബൈയില് പെട്രോള് ലിറ്ററിന് 100.19 രൂപയായി. ഡീസലിന് 92.17 രൂപയും. താനെയിലും നവി മുംബൈയിലും പെട്രോള് വില 100.32 രൂപയായി. ഡീസല് വില 92.29 രൂപയിലുമെത്തി.
ക്രിക്കറ്റ് ഇതിഹാസം ഡോണ് ബ്രാഡ്മാന്റെ ഐതിഹാസികമായ 99.94 എന്ന ബാറ്റിങ് ശരാശരിയുടെ റെക്കോര്ഡിനൊപ്പമാണ് ഇന്നലെ മുംബൈയിലെ പെട്രോള് വില എത്തി നിന്നിരുന്നത്. ഇന്നലെ അര്ദ്ധരാത്രിയോടെയാണ് മുംബൈ നഗരത്തില് പെട്രോള് വില ബ്രാഡ്മാന്റെ മാജിക്കല് ഫിഗറിനൊപ്പം എത്തിയത്.
99.94 എന്ന വില പെട്രോള് പമ്പുകളില് തെളിഞ്ഞുവന്നതോടെ ക്രിക്കറ്റ് പ്രേമികളും ട്രോളന്മാരും ആഘോഷമാക്കുകയായിരുന്നു. ബ്രാഡ്മാന് ആദരമര്പ്പിച്ചാണ് പെട്രോള് വില റെക്കോര്ഡ് ഫിഗറില് എത്തിയതെന്നും റെക്കോര്ഡ് തകര്ത്ത് സെഞ്ച്വറി നേടുന്നത് എപ്പോഴാണെന്നുമെല്ലാമായി പിന്നീട് ട്രോളന്മാരുടെ ചോദ്യങ്ങള്…!
പെട്രോള് വില ബ്രാഡ്മാന്റെ റെക്കോര്ഡ് തകര്ത്ത് നൂറു കടക്കുന്നത് നോക്കിയിരുന്ന മുംബൈയെ ഞെട്ടിച്ച് ജയ്പൂര് നഗരമാണ് ആ നേട്ടം ആദ്യം സ്വന്തം അക്കൗണ്ടിലെത്തിച്ചത്. ജയ്പൂരില് കഴിഞ്ഞ ദിവസത്തെ പെട്രോള് വില 100.17 വരെയെത്തിയിരുന്നു. ജയ്പൂര് ഉള്പ്പടെയുള്ള മറ്റു പല നഗരങ്ങളിലും പെട്രോള് വില ഇതിനോടകം സെഞ്ച്വറി പൂര്ത്തിയാക്കിയിട്ടുണ്ട്.