കോഴിക്കോട്: അദാനി വിഷയത്തില് സംഘപരിവാര് സംഘടനകളെ പരിഹസിച്ചും വിമര്ശിച്ചും മുസ്ലിംലീഗ് നേതാവ് കെ എം ഷാജി. അദാനി ഗ്രൂപ്പിനെ രക്ഷിക്കാന് ആര്എസ്എസുകാര് കാട്ടറബികള് എന്ന് വിളിച്ച അറബ് ലോകം തന്നെ വേണ്ടി വന്നുവെന്ന് ഷാജി പറഞ്ഞു. അബുദാബിയിലെ ഐഎച്ച്സി കമ്പനിയുടെ സഹായംകൊണ്ടാണ് അദാനി ഗ്രൂപ്പ് പിടിച്ചു നിന്നത്. ലോകത്തെ മുഴുവന് മുസ്ലിംകളേയും പ്രവാചകനേയും നിരന്തരം തെറി വിളിക്കുന്ന ആര്എസ്എസുകാര് ഇതെല്ലാം കാണണമെന്നും കെ എം ഷാജി പറഞ്ഞു.
‘പോറ്റമ്മ തോറ്റേ’ എന്ന് പറഞ്ഞ് ഫുട്ബോള് കളിയുടെ കാലത്ത് ഖത്തറിനെയും അറബ് ലോകത്തെയും കളിയാക്കിയവരും ഇത് മനസിലാക്കണം. നിങ്ങള് തെറി വിളിച്ച ഖത്തറില്ലേ അവരുടെ 450 മില്യണ് ഡോളറാണ് അദാനി ഗ്രൂപ്പില് നിക്ഷേപിച്ചിട്ടുളളത്. അദാനി കമ്പനി ഇന്വെസ്റ്റ്മെന്റ് സ്വീകരിച്ചു കൊണ്ട് നടത്തിയ സ്റ്റേറ്റ്മെന്റ് പറയുന്നത് പണത്തേക്കാളേറെ നമ്മുടെ മൂല്യങ്ങളാണ് ഈ നിക്ഷേപങ്ങളെന്നാണ്. ബിജെപിക്കാര്ക്ക് മൂല്യങ്ങള് എന്താണെന്ന് അറിയാമോയെന്നും കെ എം ഷാജി ചോദിച്ചു. മുസ്ലിംലീഗ് മട്ടന്നൂര് നിയോജക മണ്ഡലം സമ്മേളനത്തില് സംസാരിക്കുകയായിരുന്നു കെ എം ഷാജി.
മുസ്ലിമായത് കൊണ്ടോ അറബ് നാടായത് കൊണ്ടോ അല്ല പറയുന്നത്. അറബ് ലോകത്തെ കളിയാക്കിയ ആര്എസ്എസുകാരുടെ സാമൂഹിക മാധ്യമ പ്രൊഫൈലുകളില് അവ ഇപ്പോഴും കിടക്കുന്നുണ്ട്. ശശികലയും, ശ്രീജിത്ത് പണിക്കരും ആ എഴുത്തെങ്കിലും മായ്ച്ചു കളയണമെന്നും കെ എം ഷാജി പറഞ്ഞു.