ഇരുചക്രവാഹനത്തില് സഞ്ചരിക്കുമ്പോള് കുട്ടികള്ക്കും ഹെല്മെറ്റ് നിര്ബന്ധമാക്കാനൊരുങ്ങി കേന്ദ്ര സര്ക്കാര്. നാലു വയസിന് മുകളിലുള്ള കുട്ടികള്ക്ക് ഹെല്മെറ്റ് നിര്ബന്ധമാക്കാനാണ് നിര്ദേശം. വാഹനമോടിക്കുന്നയാളെയും കുട്ടിയേയും ബന്ധിപ്പിച്ചു കൊണ്ട് ബെല്റ്റുണ്ടാകണമെന്നും നിര്ദേശമുണ്ട്. ഇത് വാഹനം ഓടിക്കുന്നയാള് ഉറപ്പാക്കണമെന്നും കരട് വിജ്ഞാപനത്തില് പറയുന്നു. കുട്ടികളുടെ സുരക്ഷ ഉറപ്പാക്കുന്നതിന്റെ ഭാഗമായാണ് പുതിയ നിര്ദേശങ്ങള്.
കുട്ടികളുമായി യാത്ര ചെയ്യുമ്പോള് 40 കിലോമീറ്ററില് കൂടുതല് വേഗതയില് യാത്ര പാടില്ലെന്നും കേന്ദ്രത്തിന്റെ പുതിയ നിര്ദേശത്തില് പറയുന്നു. നിയമത്തിന്റെ കരടാണ് ഇപ്പോള് പുറത്തു വന്നിരിക്കുന്നത്.
വാഹനാപകടത്തില് നിരവധി കുട്ടികള്ക്ക് പരിക്കേല്ക്കുന്ന സാഹചര്യം മുന്നിര്ത്തിയാണ് കേന്ദ്രത്തിന്റെ നടപടി. ഒരു വര്ഷത്തിനുള്ളില് നിയമത്തിന്റെ അന്തിമ രൂപം പുറത്തിറക്കാനാണ് സര്ക്കാരിന്റെ പദ്ധതി.