ലക്നൗ: ഭഗത്സിങ്ങിനെ തൂക്കിലേറ്റുന്നത് അനുകരിച്ച 10 വയസ്സുകാരന് ദാരുണാന്ത്യം. തൂക്കിലേറ്റുന്നതുപോലെ അനുകരിക്കാന് കയര് കഴുത്തില് കുരുക്കുമ്പോള് കയര് മുറുകിയാണ് കുട്ടി മരിച്ചത്. ബദൗന് ജില്ലയിലെ ബാബത് ഗ്രാമത്തിലാണ് സംഭവമുണ്ടായത്.
സ്വാതന്ത്ര്യദിനത്തില് അവതരിപ്പിക്കാനിരിക്കുന്ന നാടകത്തിനുവേണ്ടി ഒരുങ്ങുന്നതിനിടെയാണ് അപകടം ഉണ്ടായത്. ബാബത് ഗ്രാമത്തിലുള്ള ഭൂരേ സിങ്ങിൻ്റെ മകന് ശിവമാണ് മരിച്ചത്. എന്നാല്, പൊലീസിനെ അറിയിക്കാതെ വീട്ടുകാര് മൃതദേഹം മറവു ചെയ്തു. സ്റ്റൂളില് കയറിനിന്ന് കഴുത്തില് കുരുക്കിട്ടശേഷം തൂക്കിലേറ്റുന്നത് അഭിനയിക്കുമ്പോള് അതു മറിഞ്ഞതാണെന്ന് കരുതുന്നു.
ഒപ്പമുണ്ടായിരുന്ന കുട്ടികള് ബഹളം വച്ചതോടെ സമീപവാസികള് ചെന്ന് കയർ അഴിച്ചുമാറ്റിയെങ്കിലും കുട്ടി മരിക്കുകയായിരുന്നു. എന്നാൽ സംഭവത്തെപ്പറ്റി സംസാരിക്കാന് കുടുംബാംഗങ്ങള് തയാറാവുന്നില്ലെന്നു പൊലീസ് പറഞ്ഞു.