ബംഗളൂരു: കര്‍ണാടക മുഖ്യമന്ത്രിയായി ബസവരാജ് ബോമ്മി സത്യപ്രതിജ്ഞ ചെയ്തു. ഗവര്‍ണര്‍ തവാര്‍ചന്ദ് ഗെലോട്ട് സത്യപ്രതിജ്ഞ ചൊല്ലിക്കൊടുത്തു. ചടങ്ങില്‍ യെദ്യൂരപ്പ പങ്കെടുത്തു.
61 കാരനായ ബസവരാജ് ബോമ്മിയെ ഇന്നലെ ബിജെപി എംഎല്‍എമാരുടെ യോഗത്തില്‍ കര്‍ണാടക മുഖ്യമന്ത്രിയായി തിരഞ്ഞെടുത്തിരുന്നു. സത്യപ്രതിജ്ഞ ചെയ്യുന്നതിന് മുന്നോടിയായി അദ്ദേഹം ഇന്ന് യെദ്യൂരപ്പയെ കണ്ടു. ബംഗളൂരുവിലെ ക്ഷേത്രത്തില്‍ അദ്ദേഹം പ്രാര്‍ത്ഥനയും നടത്തി.
മുഖ്യമന്ത്രിയെന്ന നിലയില്‍ ഒന്നാം ദിവസം മന്ത്രിസഭാ യോഗം ചേരും. കോവിഡ് -19, സംസ്ഥാനത്തെ വെള്ളപ്പൊക്കം എന്നിവ അവലോകനം ചെയ്യും.
മധ്യ കര്‍ണാടകയിലെ ഹവേരി ജില്ലയിലെ ഷിഗാവോണില്‍ നിന്ന് മൂന്നു തവണ എംഎല്‍എ ആയിരുന്ന ബോമ്മി, യെദ്യൂരപ്പയെപ്പോലെ രാഷ്ട്രീയമായി ശക്തനായ ലിംഗായത്ത് നേതാവാണ്. കര്‍ണാടകയിലെ 68 ദശലക്ഷം ജനസംഖ്യയുടെ 16 ശതമാനം വീരശൈവ- ലിംഗായത്ത് സമുദായമാണ്.
യെഡിയൂരപ്പയുടെ മന്ത്രിസഭയില്‍ ആഭ്യന്തര, നിയമം, പാര്‍ലമെന്ററി, നിയമസഭാ മന്ത്രിയായിരുന്നു. 1980 കളില്‍ കര്‍ണാടക മുഖ്യമന്ത്രിയായിരുന്ന എസ്ആര്‍ ബോമ്മിയുടെ മകനാണ്. 2008 ല്‍ ജനതാദള്‍ യുണൈറ്റഡില്‍ നിന്ന് ബിജെപിയില്‍ ചേര്‍ന്നു.
മുഖ്യമന്ത്രി സ്ഥാനം താന്‍ ഒരിക്കലും പ്രതീക്ഷിച്ചിരുന്നില്ലെന്നും തന്റെ കഠിനാധ്വാനത്തില്‍ വിശ്വാസമുണ്ടെന്നും അദ്ദേഹം എന്‍ഡിടിവിയോട് പറഞ്ഞു.
