തിരുവനന്തപുരം: ഇഎംഎസിനെ ചൂണ്ടിക്കാണിച്ച്‌ മുഖ്യമന്ത്രി പിണറായി വിജയനെതിരെ എംടി വാസുദേവൻ നായര്‍ നടത്തിയ വിമര്‍ശനം കേരള സമൂഹത്തിന്‍റെ വികാരമാണെന്ന് ബിജെപി സംസ്ഥാന അധ്യക്ഷൻ കെ.സുരേന്ദ്രൻ.പിണറായി വിജയനെ വേദിയിലിരുത്തി ഭരണാധികാരികള്‍ ജനസേവനമാണ് ചെയ്യേണ്ടതെന്ന എംടിയുടെ ഉപദേശം മുഖ്യമന്ത്രിയുടെ മുഖത്തേറ്റ പ്രഹരമാണെന്നും സുരേന്ദ്രൻ പറഞ്ഞു.
വ്യക്തിപൂജ കമ്യൂണിസ്റ്റുകാര്‍ എതിര്‍ക്കുന്നതാണെന്ന് പറയുമ്ബോള്‍ കേരളത്തിലെ ഏക കമ്യൂണിസ്റ്റ് മുഖ്യമന്ത്രിക്ക് വ്യക്തിപൂജ നടത്തുകയാണ് അദ്ദേഹത്തിന്‍റെ സഹപ്രവര്‍ത്തകര്‍ ചെയ്യുന്നത്. കമ്യൂണിസത്തിന്‍റെ ഈ ഇരട്ടത്താപ്പിനെയാണ് എം.ടി ചോദ്യം ചെയ്തിരിക്കുന്നത്.
എംടിയുടെ ശബ്ദം കേരള ജനത ഏറ്റെടുക്കുമെന്നുറപ്പാണ്. കടലിലെ വെള്ളം ബക്കറ്റിലെടുത്താല്‍ ബക്കറ്റിലെ വെള്ളത്തിന് വിലയുണ്ടാവില്ലെന്നും കടലിലെ വെള്ളം കടലിനോട് ചേര്‍ന്ന് നിന്നാലേ വിലയുണ്ടാകുകയുള്ളൂവെന്നും വിഎസിനെ ഉപദേശിച്ച പിണറായി ഇപ്പോള്‍ വെറും ചിരട്ടയിലെ വെള്ളമായി മാറിക്കഴിഞ്ഞുവെന്നും കെ.സുരേന്ദ്രൻ കൂട്ടിച്ചേര്‍ത്തു.
