കാട്ടാക്കട: പ്രായപൂര്ത്തിയാകാത്ത പെണ്കുട്ടിയെ ലൈംഗികമായി പീഡിപ്പിച്ച കേസില് കുട്ടിയുടെ അമ്മയുള്പ്പെടെ മൂന്നുപേരെ കാട്ടാക്കട പോലീസ് അറസ്റ്റുചെയ്തു. നെയ്യാര്ഡാം ഇടവാച്ചല് കുഞ്ചു നിവാസില് അഖില് ദേവ് (25), ഇയാളുടെ പെണ് സുഹൃത്ത് മൂങ്ങോട് വിനീഷാ ഭവനില് വിനീഷ(24) എന്നിവരും കുട്ടിയുടെ അമ്മയുമാണ് അറസ്റ്റിലായത്.
എറണാകുളത്ത് ഹോസ്റ്റലില് താമസിക്കുന്ന തമിഴ്നാട് സ്വദേശിയായ യുവതിയുടെ 13 കാരിയായ മകളെ അമ്മയുടെ അനുവാദത്തോടെ വിവിധയിടങ്ങളില് കൊണ്ടുപോയി പീഡിപ്പിച്ചതായാണ് കേസ്. എറണാകുളത്ത് ട്രെയിനില് വച്ചാണ് അഖില്ദേവ് കുട്ടിയുടെ അമ്മയെ പരിചയപ്പെടുന്നത്.
തുടര്ന്ന് പെണ്കുട്ടിയെ എറണാകുളത്തെ ലോഡ്ജില് കൊണ്ടുപോയി പീഡിപ്പിച്ചു. പിന്നീട് അമ്മയ്ക്ക് പണം നല്കി കാട്ടാക്കടയെത്തിച്ച് ലോഡ്ജില് പാര്പ്പിച്ച് കുട്ടിയെ പീഡിപ്പിച്ചു. ഇവിടെനിന്നു കുട്ടിയെ പെണ് സുഹൃത്തായ വിനീഷയുടെ വീട്ടിലെത്തിച്ചു. ഇവിടെ കഴിയവേ വിനീഷയുടെ അമ്മയ്ക്ക് സംശയംതോന്നി പോലീസില് വിവരം അറിയിച്ചതോടെയാണ് സംഭവം പുറത്തറിഞ്ഞത്. പ്രതികളെ കാട്ടാക്കട കോടതിയില് ഹാജരാക്കി റിമാന്ഡ് ചെയ്തു.
