പ്രണയം നിരസിച്ച യുവതിയെ കൊലപ്പെടുത്താന് പെട്രോളുമായി എത്തിയ യുവാവ് പൊലീസിന്റെ പിടിയിലായി. കോഴിക്കോട് താമരശ്ശേരിയിലാണ് സംഭവം. കുറ്റ്യാടി പാലേരി സ്വദേശി അരുണ്ജിത്തിനെയാണ് (24) പൊലീസ് അറസ്റ്റ് ചെയ്തത്. യുവതിയുടെ വീട്ടിലേക്ക് അരുണ്ജിത്ത് കയറി വരുന്നത് കണ്ട അമ്മ വാതില് അടച്ചതിനാല് വീടിനകത്തേക്ക് കയറാനായില്ല.
ഇന്സ്റ്റാഗ്രാം വഴി വര്ഷങ്ങള്ക്കുമുമ്പ് പരിചയപ്പെട്ട പെണ്കുട്ടിയെയാണ് കൊലപ്പെടുത്താന് ശ്രമിച്ചത്. ഞായറാഴ്ച യുവതിയുടെ വീട്ടിലേക്ക് അരുണ്ജിത്ത് കയറി വരുന്നത് കണ്ട അമ്മ വാതില് അടക്കുകയായിരുന്നു. ഇതിനാല് പ്രതിക്ക് വീടിനകത്തേക്ക് പ്രവേശിക്കാന് സാധിച്ചില്ല. വിവരമറിഞ്ഞ് ഓടിയെത്തിയ നാട്ടുകാര് യുവാവിനെ തടഞ്ഞ് വെച്ച് പൊലീസില് ഏല്പ്പിക്കുകയായിരുന്നു. ഇയാളുടെ പക്കല് നിന്ന് ഒരു ലിറ്റര് പെട്രോളും, ലൈറ്ററും പൊലീസ് കണ്ടെടുത്തു. പ്രതി മുമ്പും പെണ്കുട്ടിയുടെ വീട്ടില് എത്തിയിട്ടുണ്ടെന്ന് പൊലീസ് പറയുന്നു. ഇന്നലെ ഉച്ചയ്ക്കാണ് സംഭവം നടന്നത്.
സംഭവത്തെ കുറിച്ച് കൂടുതല് അന്വേഷണം നടത്തുകയാണെന്നും അതിന് ശേഷമേ വിശദാംശങ്ങള് പറയാന് കഴിയുകയുള്ളൂവെന്നും പൊലീസ് അറിയിച്ചു. താമരശ്ശേരി പൊലീസ് അറസ്റ്റുചെയ്ത പ്രതിയെ പിന്നീട് താമരശ്ശേരി ജെഎഫ്സിഎം കോടതിയില് ഹാജരാക്കി റിമാന്ഡ് ചെയ്തു
