സംസ്ഥാനത്തെ പ്ലസ് വണ് പ്രവേശനത്തിന് ഇന്ന് മുതല് ഓണ്ലൈനായി അപേക്ഷ സമര്പ്പിക്കാം. ജൂലൈ 18 ആണ് അവസാന തിയതി. ജൂലൈ 21ന് ട്രയല് അലോട്ട്മെന്റ് നടക്കും. സെപ്തംബര് 30 ഓടു കൂടി പ്രവേശന നടപടികള് പൂര്ത്തിയാക്കാനാണ് ഉദ്ദേശിക്കുന്നത്.
ആദ്യ ആലോട്ട്മെന്റ് ജൂലൈ 27നും, ആദ്യഘട്ടത്തിലെ അവസാന അലോട്ട്മെന്റ് ആഗസ്റ്റ് 11നും നടക്കും. മുഖ്യഘട്ടത്തിലെ മൂന്ന് അലോട്ട്മെന്റുകളിലൂടെ ഭൂരിഭാഗം സീറ്റുകളില് പ്രവേശനം ഉറപ്പാക്കി ആഗസ്റ്റ് 17ന് പ്ലസ് വണ് ക്ലാസുകള് ആരംഭിക്കും. മുഖ്യഘട്ടം കഴിഞ്ഞാല് പുതിയ അപേക്ഷകള് ക്ഷണിച്ച് സപ്ലിമെന്ററി അലോട്ട്മെന്റിലൂടെ ശേഷിക്കുന്ന ഒഴിവുകള് നികത്തുകയും, 2022 സെപ്റ്റംബര് 30ന് പ്രവേശന നടപടികള് അവസാനിപ്പിക്കുകയും ചെയ്യും.
ഏഴ് ജില്ലകളിലെ സര്ക്കാര് സ്കൂളുകളില് 30 ശതമാനം സീറ്റുകള് കൂട്ടിയിട്ടുണ്ട്. തിരുവനന്തപുരം, പാലക്കാട്, കോഴിക്കോട്, മലപ്പുറം, വയനാട്, കണ്ണൂര്, കാസര്കോഡ് എന്നീ ജില്ലകളിലെ സീറ്റുകളാണ് കൂട്ടിയത്. ഈ ജില്ലകളിലെ എയ്ഡഡ് സ്കൂളുകളിലും 20 ശതമാനം സീറ്റു വര്ദ്ധനവ് നടപ്പാക്കും. ആവശ്യപ്പെടുന്ന എയ്ഡഡ് സ്കൂളുകള്ക്ക് 10 ശശമാനം വര്ദ്ധനവ് കൂടി അനുവദിക്കും. കൊല്ലം, എറണാകുളം, തൃശൂര് എന്നീ മൂന്ന് ജില്ലകളില് എല്ലാ സര്ക്കാര്, എയ്ഡഡ് ഹയര്സെക്കണ്ടറി സ്കൂളുകളിലും 20 % മാര്ജിനല് സീറ്റ് വര്ദ്ധനവ് നടപ്പാക്കും.
നീന്തല് അറിയാവുന്നവര്ക്ക് നല്കിയിരുന്ന ബോണസ് മാര്ക്ക് ഇക്കുറി ഒഴിവാക്കിയിട്ടുണ്ട്. കഴിഞ്ഞ അധ്യയന വര്ഷം താല്കാലികമായി അനുവദിച്ച 75 ബാച്ചുകളും ഷിഫ്റ്റ് ചെയ്ത 4 ബാച്ചുകളും ഉള്പ്പടെ 81 താല്ക്കാലിക ബാച്ചുകള് ഈ വര്ഷവും ഉണ്ടായിരിക്കും.
