ആദ്യ മത്സരത്തില് ഇന്ത്യയ്ക്കെതിരെ മികച്ച വിജയം നേടിയതിന്റെ ആത്മവിശ്വാസവുമായി കളത്തിലിറങ്ങിയ പാകിസ്താന് രണ്ടാം മത്സരത്തിലും ജയം. ന്യൂസിലാന്ഡിന്റെ 135 റണ്സിന്റെ വിജയലക്ഷ്യം 18.4 ഓവറില് അഞ്ചുവിക്കറ്റ് നഷ്ടത്തില് പാകിസ്താന് മറികടന്നു. ആദ്യ മത്സര ഹീറോകളിലൊരാളായ ബാബര് അസം ഒമ്പതു റണ്സെടുത്ത് സൗത്തിയുടെ ബോളില് ബൗള്ഡായി. മറ്റൊരു ഓപ്പണറായ റിസ്വാന് 33 റണ്സെടുത്ത് ഇഷ് സോദിയുടെ ബോളില് പുറത്തായി. പിന്നീട് വന്ന ഫഖര് സമാനും മുഹമ്മദ് ഹഫീസും 11 റണ്സ് വീതം സ്കോര് ബോര്ഡില് പവലിയനിലേക്ക് തിരിച്ചു കയറി. എന്നാല് മുന്ക്യാപ്റ്റനായ ഷുഹൈബ് മാലികും ആസിഫ് അലിയും ചേര്ന്ന് പാകിസ്താന് രണ്ടാം വിജയം സമ്മാനിക്കുകയായിരുന്നു. മാലിക് 26 ഉം ആസിഫ് അലി 27 ഉം റണ്സെടുത്ത് പുറത്താകാതെ നിന്നു.
തുടര്ച്ചയായ രണ്ടാം മത്സരത്തിലും മികച്ച പ്രകടനം പുറത്തെടുത്ത പാക് ബൗളര്മാര് എതിരാളികളെ 134 റണ്സില് ഒതുക്കുകയായിരുന്നു. ന്യൂസിലാന്ഡിന് എട്ടുവിക്കറ്റ് നഷ്ടമായി. നാല് ഓവറില് 22 റണ്സ് മാത്രം വഴങ്ങി നാലു വിക്കറ്റ് വീഴ്ത്തിയ ഹാരിസ് റൗഫാണ് ന്യൂസിലാന്ഡ് ബാറ്റിങ്ങിന്റെ നട്ടെല്ലൊടിച്ചത്. ടോസ് നേടിയ പാക് നായകന് ബാബര് അസം ന്യൂസിലാന്ഡിനെ ബാറ്റിങ്ങിന് അയക്കുകയായിരുന്നു.
ഓപണര്മാരായ മാര്ട്ടിന് ഗപ്ടിലും ഡാരില് മിച്ചലും താരതമ്യേന മികച്ച തുടക്കമാണ് ന്യൂസിലാന്ഡിന് നല്കിയത്. സ്കോര് 36ല് നില്ക്കവെ 20 പന്തില് 17 റണ്സെടുത്ത ഗപ്ടിലാണ് ആദ്യം പുറത്തായത്. ഹാരിസ് റൗഫിന്റെ പന്തില് ക്ലീന് ബൗള്ഡ്. ഒമ്പതാം ഓവറില് 27 റണ്സെടുത്ത മിച്ചലും പുറത്തായി. 20 പന്തില് നിന്ന് രണ്ടു സിക്സറും ഒരു ബൗണ്ടറിയും സഹിതമായിരുന്നു താരത്തിന്റെ ഇന്നിങ്സ്. ഇമാദ് വസീമിന്റെ പന്തില് ഫഖര് സമാന് പിടിച്ചാണ് മിച്ചല് പുറത്തായത്.
വണ്ഡൗണായി എത്തിയ ക്യാപ്റ്റന് കെയ്ന് വില്യംസണ് നങ്കൂരമിട്ടു കളിച്ചെങ്കിലും 25 റണ്സെടുത്തു നില്ക്കവെ റണ്ഔട്ടായി. പിന്നാലെ വന്ന ജെയിംസ് നീഷമിന് രണ്ടു പന്തില് ഒരു റണ്സെടുക്കാനേ ആയുള്ളൂ. എന്നാല് പിന്നീടെത്തിയ ഡെവന് കൊണ്വേയും ഗ്ലന് ഫിലിപ്സും പിടിച്ചു നിന്നു. എന്നാല് തൊട്ടടുത്ത പന്തുകളില് ഹാരിസ് റൗഫ് ഇരുവരെയും പുറത്താക്കിയതോടെ ന്യൂസിലാന്ഡ് പ്രതിരോധത്തിലായി. വാലത്ത് ടിം സീംഫെര്ട്ടിനും (8) മിച്ചല് സാന്റ്നറിനും (6) സോധിക്കും (2) കാര്യമായി ഒന്നും ചെയ്യാനായില്ല. ഷഹീന് അഫ്രീദിയും ഇമാദ് വസീമും മുഹമ്മദ് വസീമും ഓരോ വിക്കറ്റ് വീതം വീഴ്ത്തി.
