ഫ്രാന്സിനെ പരാജയപ്പെടുത്തി അര്ജന്റീന ലോകകപ്പില് മുത്തമിട്ടതോടെ തുടങ്ങിയ പരിഹാസങ്ങള്ക്കിടെ പരിശീലനത്തിനിറങ്ങി ഫ്രഞ്ച് സൂപ്പര് താരം കിലിയന് എംബാപ്പെ. തന്റെ ക്ലബായ പാരിസ് സെയ്ന്റ് ജെര്മയ്ന് കേന്ദ്രത്തിലാണ് ലോകകപ്പില് ഗോള്ഡന് ബൂട്ട് ജേതാവായ താരം പരിശീലനത്തിന് എത്തിയത്. ലോകകപ്പ് ഫൈനല് കഴിഞ്ഞ് മൂന്നു ദിവസത്തിനകമാണ് എംബാപ്പെ പരിശീലനത്തിനിറങ്ങിയിരിക്കുന്നത്. അര്ജന്റീനന് നായകന് ലയണല് മെസിയും ബ്രസീല് സൂപ്പര്താരം നെയ്മറുമൊക്കെ കളിക്കുന്ന ക്ലബാണ് പി.എസ്.ജി.
ക്ലബിന്റെ ഔദ്യോഗിക സമൂഹ മാധ്യമ അക്കൗണ്ടിലൂടെയാണ് താരം പരിശീലനത്തിന് എത്തിയ വിവരം പങ്കുവെച്ചത്. ഖത്തറില് നിന്ന് തിരിച്ചെത്തിയ എംബാപ്പെ തിങ്കളാഴ്ച പാരീസിലെ പബ്ലിക് സ്ക്വയറായ പ്ലേസ് ഡെ ലാ കോന്കോര്ഡില് നടന്ന ലോകകപ്പ് ആഘോഷത്തില് പങ്കെടുത്തിരുന്നു. ശേഷം പത്തു ദിവസമെങ്കിലും അവധിയെടുക്കുമെന്ന് കരുതപ്പെട്ടിരുന്നുവെങ്കിലും 24 കാരനായ താരം ക്ലബിലേക്ക് വരികയായിരുന്നു.
ലീഗ് വണ്ണില് ഡിസംബര് 28ന് സ്ട്രാസ്ബര്ഗിനെതിരെതിരെയാണ് പിഎസ്ജിയുടെ അടുത്ത മത്സരം. മത്സരത്തില് താരം പങ്കെടുക്കാനാണ് സാധ്യത. ലോകകപ്പില് ഏഴുമത്സരങ്ങളിലായി എട്ടു ഗോളുകളാണ് എംബാപ്പെ അടിച്ചുകൂട്ടിയത്. രണ്ട് അസിസ്റ്റും താരം കാഴ്ചവെച്ചു. ഫ്രാന്സ് ലോകചാമ്പ്യന്മാരായ 2018ലേതടക്കം 12 ലോകകപ്പ് ഗോളുകളാണ് എംബാപ്പെയുടെ പേരിലുള്ളത്. ലോകകപ്പിലെ ഏറ്റവും വലിയ ഗോള്വേട്ടക്കാരനായ ജര്മനിയുടെ മുന് ഫോര്വേഡ് മിറോസ്ലേവ് ക്ലോസെയേക്കാള് നാലു ഗോള് മാത്രമാണ് താരം പിറകിലുള്ളത്. 24 വയസ്സ് മാത്രമുള്ള താരം ഈ റെക്കോര്ഡ് മറികടക്കാനാണ് സാധ്യത.
ലീഗ് വണ്ണില് ഒന്നാം സ്ഥാനത്താണ് പിഎസ്ജിയുള്ളത്. 15 മത്സരങ്ങളില് തോല്വിയറിയാതെ ടീം മുന്നേറുകയാണ്. ചാമ്പ്യന്സ് ലീഗ് ഗ്രൂപ്പിലും പിഎസ്ജി തോല്വിയറിഞ്ഞിരുന്നില്ല. എന്നാല് കൂടുതല് എവേ ഗോളുകള് നേടിയ ബെന്ഫിക്കയ്ക്ക് പിറകില് രണ്ടാമതാണ് ടീം. ചാമ്പ്യന്സ് ലീഗില് ബയേണ് മൂണിച്ചിനെതിരയെടക്കം മത്സരം നടക്കാനിരിക്കെ എംബാപ്പെ ക്ലബിന് മികച്ച സംഭാവനകള് നല്കുമെന്നാണ് പ്രതീക്ഷിക്കപ്പെടുന്നത്.