സ്ത്രീ- പുരുഷ അനുപാതത്തില് വലിയ വ്യത്യാസം വന്നാല് അത് കുറേ പ്രശ്നങ്ങളുണ്ടാക്കും അല്ലേ? എന്തിന് വിവാഹം നടക്കാതിരിക്കാന് വരെ അത് കാരണമായി തീര്ന്നേക്കും. അതുപോലെ സംഭവിച്ചിരിക്കുകയാണ് മഹാരാഷ്ട്രയിലെ സോലാപൂര് ജില്ലയിലും. ഒടുവില് വിവാഹം ചെയ്യാന് പെണ്ണ് കിട്ടാനില്ലാത്തതിനാല് പരാതിയുമായി കലക്ടറേറ്റിലേക്ക് വരെ യുവാക്കള് മാര്ച്ച് നടത്തി. തങ്ങള്ക്ക് അനുയോജ്യരായ വധുക്കളെ കണ്ടെത്തി തരണം എന്നും യുവാക്കള് ആവശ്യപ്പെട്ടു.
പരാതിയും പ്രതിഷേധവും അറിയിക്കാനായി യുവാക്കള് പോയത് കുതിരപ്പുറത്താണ്. മാത്രമല്ല, പലരും മണവാളന്റെ വേഷവും ധരിച്ചിട്ടുണ്ടായിരുന്നു, പോരാത്തതിന് മാര്ച്ചിന് സംഗീതത്തിന്റെ അകമ്പടിയും ഉണ്ടായിരുന്നു.
വിവാഹ പ്രായമായിട്ടും വിവാഹം കഴിക്കാന് യുവതികളെ കിട്ടാത്തതില് നിരാശരായ യുവാക്കള് തങ്ങള്ക്ക് അനുയോജ്യരായ യുവതികളെ വിവാഹം കഴിക്കാന് കണ്ടെത്തി തരണം എന്നും നിവേദനത്തില് ആവശ്യപ്പെട്ടിരുന്നു. മഹാരാഷ്ട്രയിലെ സ്ത്രീ പുരുഷാനുപാതം ആയിരം ആണ്കുട്ടികള്ക്ക് 889 പെണ്കുട്ടികള് എന്നാണ്. അതെങ്ങനെയാണ് ശരിയാവുക എന്ന ചോദ്യവും പ്രതിഷേധവുമായി മാര്ച്ച് നടത്തിയ യുവാക്കള് ഉന്നയിച്ചു.
പെണ്ഭ്രൂണഹത്യ, ഗര്ഭസ്ഥ ശിശുക്കളുടെ ലിംഗ നിര്ണയം ഇവയെല്ലാം പെണ്കുഞ്ഞുങ്ങളുടെ എണ്ണം നാട്ടില് കുറയുന്നതിന് കാരണമായിത്തീരുന്നു എന്നും യുവാക്കള് ആരോപിച്ചു. അത് ഇല്ലാതെയാക്കാനുള്ള നടപടികള് എടുക്കണം എന്ന് ആവശ്യപ്പെട്ട് കൊണ്ടുള്ള നിവേദനവും ഇവര് കലക്ടര്ക്ക് സമര്പ്പിച്ചിട്ടുണ്ട്.
‘ആളുകള് ഈ പ്രതിഷേധ മാര്ച്ചിനെ കളിയാക്കിയേക്കും, എന്നാല് യാഥാര്ത്ഥ്യം എന്താണെന്നാല് വിവാഹ പ്രായമെത്തിയ യുവാക്കള്ക്ക് ഇവിടെ വിവാഹം കഴിക്കാന് വധുവിനെ കിട്ടുന്നില്ല. അതിന് കാരണം ഇവിടുത്തെ സ്ത്രീ-പുരുഷ അനുപാതത്തിലെ വ്യത്യാസമാണ്. അതിന് കാരണം പെണ്ഭ്രൂണ ഹത്യയാണ്. അത് ഇല്ലാതെയാക്കാന് ഇടപെടേണ്ടത് സര്ക്കാരാണ്’ എന്ന് മാര്ച്ച് സംഘടിപ്പിച്ച ജ്യോതി ക്രാന്തി പരിഷത്തിന്റെ സ്ഥാപകനായ രമേഷ് ഭരസ്കര് മാധ്യമങ്ങളോട് പറഞ്ഞു.