കോട്ടയം: ബിജെപിയുടെ വോട്ട് യുഡിഎഫിന് മറിച്ചുവെന്ന സിപിഎം സംസ്ഥാന സെക്രട്ടറി എം വി ഗോവിന്ദന്റെ ആരോപണം തങ്ങള്ക്കുണ്ടാവാനിടയുള്ള ദയനീയമായ പരാജയം മുന്കൂട്ടിക്കണ്ടുകൊണ്ടുള്ള മുന്കൂര് ജാമ്യാപേക്ഷയാണെന്ന് മുന് മന്ത്രിയും കോണ്ഗ്രസ്സ് രാഷ്ട്രീയകാര്യ സമിതി അംഗവുമായ കെ സി ജോസഫ് പറഞ്ഞു.
ഈ തെരഞ്ഞെടുപ്പില് ഒരു ചരിത്ര വിജയം തന്നെ യുഡിഎഫ് സ്ഥാനാര്ത്ഥി ചാണ്ടി ഉമ്മന് പുതുപ്പള്ളി നല്കുമെന്നും അദേഹം പറഞ്ഞു. പോളിംഗ് ശതമാനം കുറഞ്ഞതില് അത്ഭുതപ്പെടാനൊന്നുമില്ല.
2021 ലെ നിയമസഭാ സഭാ തെരഞ്ഞെടുപ്പില് ഉപയോഗിച്ച വോട്ടര്പ്പട്ടിക തന്നെയാണ് പുതുപ്പള്ളി ഉപതെരഞ്ഞെടുപ്പിലും ഉപയോഗിച്ചിരിക്കുന്നത്. അതിനു ശേഷം മരിച്ചു പോയ ആളുകളെ പട്ടികയില് നിന്ന് നീക്കം ചെയ്തിട്ടില്ല. ഉമ്മന് ചാണ്ടിയുടെ പേരും ഇപ്പോള് പട്ടികയില് ഉണ്ട്. ഈ കാലത്തു നിരവധി ചെറുപ്പക്കാര് ജോലി തേടിയും വിദ്യാഭ്യാസ ആവശ്യത്തിനായും വിദേശ രാജ്യങ്ങളിലേക്ക് പോയിട്ടുണ്ട്. അവരുടെ പേരും ഇപ്പോള് പട്ടികയില് നിലവിലുണ്ട്. ഈ കണക്കുകള് പരിശോധിക്കുമ്ബോള് ഇപ്പോഴത്തെ വോട്ടിംഗ് ശതമാനം ഒട്ടും അതിശയിപ്പിക്കുന്നതല്ല.
മറിച്ച് ഒരു തരത്തിലും വോട്ടു ചെയ്യാന് കഴിയാത്തവരെ ഒഴിവാക്കിയാല് ഏതാണ്ട് 76 ശതമാനമായി പോളിംഗ് ശതമാനം പുതുപ്പള്ളിയില് ഉയരും. പോളിംഗ് ദിവസം പോലും ഉമ്മന് ചാണ്ടിയുടെ ചികിത്സാ വിഷയം വിവാദമാക്കാന് മന്ത്രി വി എന് വാസവനേപ്പോലുള്ള നേതാക്കന്മാര് ശ്രമിച്ചത് പരാജയ ഭീതി കൊണ്ട് മാത്രമാണ്. പുതുപ്പള്ളിയിലെ ജനങ്ങള് യാഥാര്ത്ഥ്യ ബോധത്തോടെ തന്നെ വോട്ടവകാശം വിനിയോഗിച്ചിട്ടുണ്ട്. അത് തീര്ച്ചയായും എട്ടാം തീയ്യതി വേട്ടെണ്ണുമ്ബോള് സിപിഎം നേതാക്കള്ക്ക് മനസ്സിലാകുമെന്നും കെ സി ജോസഫ് വ്യക്തമാക്കി.