ബയോമെട്രിക് പഞ്ചിങ് സംവിധാനം മൂന്ന് മാസത്തിനകം കേരളത്തിലെ എല്ലാ ഡിപ്പോകളിലും നടപ്പിലാക്കുമെന്ന് മന്ത്രി ആന്റണി രാജു. ചീഫ് ഓഫീസില്‍ നവംബര്‍ ഒന്നിന് ബയോമെട്രിക് പഞ്ചിങ് നിലവില്‍ വരും. കെഎസ്ആര്ടിസി ബസുകളില്‍ ജനപ്രതിനിധികള്‍ക്ക് ഫ്രീ പാസ് വേണ്ടന്ന ഹൈക്കോടതി പരാമര്‍ശം തന്റെ ശ്രദ്ധയില്‍ പെട്ടിട്ടില്ലെന്നും മന്ത്രി പറഞ്ഞു.
അതേസയമം, കെഎസ്ആര്‍ടിസിയുടെ തിരുവനന്തപുരം സിറ്റി സര്‍ക്കുലര്‍ ബസുകളുടെ വരുമാനം ലാഭത്തിലേക്കെന്നാണ് കണക്കുകള്‍ വ്യക്തമാക്കുന്നത്. കെഎസ്ആര്ടിസി തിരുവനന്തപുരം നഗരത്തില്‍ പ്രധാന സര്‍ക്കാര്‍ സ്ഥാപനങ്ങള്‍, ആശുപത്രികള്‍, മറ്റ് പ്രധാന കേന്ദ്രങ്ങള്‍ എന്നിവയെ ബന്ധിപ്പിച്ച് 2021 നവംബര്‍ 29 ന് ആണ് 64 സിറ്റി സര്‍ക്കുലര്‍ സര്‍വ്വീസ് ആരംഭിച്ചത്. ജന്റം ഡീസല്‍ ബസുകള്‍ ഉപയോഗിച്ചായിരുന്നു ഈ സര്‍വ്വീസുകള്‍ .
തുടക്ക സമയത്ത് ആയിരത്തോളം യാത്രക്കാര്‍ മാത്രമായിരുന്നു ഈ സര്‍ക്കുലര്‍ ബസുകളില്‍ യാത്ര ചെയ്തിരുന്നതെങ്കില്‍ ഇപ്പോള്‍ ദിവസേന 34,000 ത്തിലധികം യാത്രക്കാരാണ് ദിനം പ്രതി ഈ ബസിനെ ആശ്രയിക്കുന്നത്. യാത്രാക്കാരുടെ എണ്ണം ഈ സാമ്പത്തിക വര്‍ഷം തന്നെ ദിവസേന 50,000 എന്ന ലക്ഷ്യത്തില്‍ എത്തിക്കുകയെന്നതാണ് കെഎസ്ആര്‍ടിസിയുടെ ലക്ഷ്യം.
