കണ്ണൂര്‍: പ്രധാനമന്ത്രി വിഷലിപ്തമായ വര്‍ഗീയ പ്രചാരണത്തിന് നേതൃത്വം നല്‍കുകയാണെന്ന് മുഖ്യമന്ത്രി പിണറായി വിജയന്‍. എന്നിട്ടും കമാന്നൊരക്ഷരം തിരഞ്ഞെടുപ്പ് കമ്മീഷന്‍ പറഞ്ഞില്ല: ബിജെപി വര്‍ഗീയ കാര്‍ഡിറക്കി കളിക്കുകയാണ്. പ്രത്യേക മതവിഭാഗത്തിനെതിരെ പ്രധാനമന്ത്രി പച്ചയായി ആക്ഷേപം ഉന്നയിച്ചു. തിരഞ്ഞെടുപ്പ് കമ്മീഷന്‍ അതിന്റെ നിഷ്പക്ഷത ജനങ്ങളെ ബോധ്യപ്പെടുത്തേണ്ട ഘട്ടമാണിതെന്നും പിണറായി പറഞ്ഞു.കേന്ദ്ര സര്‍ക്കാരിന്റെ ഉന്നതര്‍ ചട്ടലംഘനം നടത്തിയപ്പോള്‍ തെരഞ്ഞെടുപ്പ് കമ്മീഷന്‍ നടപടി ഒന്നും എടുത്തില്ലെന്നും പിണറായി വിജയന്‍ ആരോപിച്ചു.
പൂരം വിവാദത്തില്‍ ഗൗരവമായ അന്വേഷണം നടക്കുന്നുണ്ടെന്ന് മുഖ്യമന്ത്രി പറഞ്ഞു. തിരഞ്ഞെടുപ്പ് ഘട്ടത്തില്‍ സര്‍ക്കാരിന് പരിമിതികള്‍ ഉണ്ട്. തുടക്കം മുതലേ ചില പ്രശ്‌നങ്ങള്‍ ഉണ്ടായിരുന്നു. ഉണ്ടായ പ്രശ്‌നങ്ങള്‍ ഗൗരവമായി കാണുന്നു. പ്രത്യക്ഷത്തില്‍ വീഴ്ച ഉണ്ടായ ഉദ്യോഗസ്ഥനെതിരെ നടപടി സ്വീകരിക്കും. അന്വേഷണത്തിന്റെ അടിസ്ഥാനത്തില്‍ തുടര്‍ നടപടികള്‍ സ്വീകരിക്കുമെന്നും മുഖ്യമന്ത്രി അറിയിച്ചു.
രാഹുല്‍ ഗാന്ധിക്കെതിരെയുള്ള വിമര്‍ശനം മുഖ്യമന്ത്രി ആവര്‍ത്തിച്ചു. രാഹുല്‍ ഗാന്ധിക്ക് നല്ല മാറ്റം വന്നു എന്ന് കോണ്‍ഗ്രസ് നേതാക്കള്‍ പറയുന്നു. എന്നാല്‍ ഇപ്പോള്‍ രാഹുലിന്റെ നിലപാട് രാഷ്ട്രീയ നേതാവിന് പറ്റിയ രീതിയല്ല. പഴയ പേരിലേക്ക് രാഹുല്‍ മാറരുതെന്നും മുഖ്യമന്ത്രി പറഞ്ഞു. പി വി ആന്‍വറിന്റെ ഡിഎന്‍എ പ്രസ്തവനയോട് രാഹുല്‍ പറയുമ്പോള്‍ തിരിച്ച് കിട്ടും എന്ന് ആലോചിക്കണമെന്നായിരുന്നു മുഖ്യമന്ത്രിയുടെ പ്രതികരണം. പൗരത്വ നിയമ ഭേദഗതിക്കെതിരെ രാഹുലിന് മൗനമാണെന്നും മുഖ്യമന്ത്രി പറഞ്ഞു.
