തിരുവനന്തപുരം: സിപിഎമ്മിന് ഇപ്പോൾ വി എസ് താരപ്രചാരകനല്ല. തെരഞ്ഞെടുപ്പ് കമ്മീഷന് പാർട്ടി നൽകിയ താര പ്രചാരകരുടെ പട്ടികയിൽ വി എസ് അച്യുതാനന്ദന്‍റെ പേരില്ല.
അണികളെ ആവേശക്കടലിലാഴ്ത്തിയാണ് ഇപ്പോഴും വി എസ് അച്യുതാനന്ദന്‍റെ പ്രചാരണം. പക്ഷെ സിപിഎമ്മിന് ഇപ്പോൾ വി എസ് താരപ്രചാരകനല്ല. മാർച്ച് 26ന് തെരഞ്ഞെടുപ്പ് കമ്മീഷന് പാർട്ടി നൽകിയ താരപ്രചാരകരുടെ പട്ടികയിൽ ആകെ 40 പേരാണ് ഉള്ളത്. പിണറായിക്കും കോടിയേരിക്കും പുറമെ സംസ്ഥാനത്ത് നിന്നും എ വിജയരാഘനും തോമസ് ഐസക്കും എളമരം കരീമും പട്ടികയിൽ ഇടം പിടിച്ചപ്പോൾ വിഎസ് പുറത്തായി.
കഴിഞ്ഞ നിയമസഭാ തെരഞ്ഞെടുപ്പ് വരെ വി എസ്സ് ആയിരുന്നു പാർട്ടിയുടെ പ്രധാന താരം. മാറ്റത്തിന്‍റെ കാരണം പാർട്ടി വ്യക്തമാക്കിയിട്ടില്ല. ഇത്തവണ വി എസിന്‍റെ ഫോട്ടോ ഇല്ലാതെയാണ് എൽഡിഎഫിന്‍റെ ഔദ്യോഗിക പോസ്റ്ററുകൾ ഇറങ്ങിയത്. വോട്ടഭ്യർത്ഥിച്ചുള്ള പോസ്റ്ററിൽ പിണറായിയും കോടിയേരിയും മാത്രം. താരപ്പട്ടികക്ക് പുറത്താണ് സ്ഥാനമെങ്കിലും വി എസ്സിനെ മണ്ഡലത്തിലെത്തിക്കാൻ സ്ഥാനാർത്ഥികൾ സമ്മർദ്ദം ചെലുത്തുന്നുണ്ട്. 12 ഇടത്തെ പ്രചാരണത്തിൽ പങ്കെടുക്കാനാണ് വി എസ് ഇതുവരെ സമ്മതിച്ചത്.
