ബംഗലുരു: കള്ളപ്പണം വെളുപ്പിക്കല് കേസില് അറസ്റ്റിലായ കര്ണാടകയിലെ കോണ്ഗ്രസ് നേതാവ് ഡി.കെ. ശിവകുമാറിനെ ഇന്ന് കോടതിയില് ഹാജരാക്കും. ഇന്നലെ രാത്രിയില് അറസ്റ്റ് ചെയ്ത ശിവകുമാറിനെ ആര്എംഎല് ആശുപത്രിയില് പ്രവേശിപ്പിച്ചിരിക്കുകയാണ്. ആശുപത്രിയിലെ പ്രത്യേക മുറിയില് ശിവകുമാറിനെ ഡോക്ടര്മാര് രാവിലെ പരിശോധിച്ച ശേഷമാകും കോടതിയില് ഹാജരാക്കുക.
ചോദ്യം ചെയ്യലിനോട് സഹകരിക്കാത്തതിനാല് കസ്റ്റഡി ആവശ്യപ്പെടും. തുടര്ച്ചയായി നാലുദിവസം ചോദ്യം ചെയ്തശേഷമാണ് എന്ഫോഴ്സ്മെന്റ് ഡയറക്ടറേറ്റ് (ഇ.ഡി) അറസ്റ്റ് രേഖപ്പെടുത്തിയത്. അനധികൃതസ്വത്ത് ആരോപണത്തേത്തുടര്ന്ന് 2017-ല് ആദായനികുതി വകുപ്പ് ശിവകുമാറിന്റെ ഡല്ഹിയിലും ബംഗളുരുവിലുമുള്ള വസതികളിലടക്കം റെയ്ഡ് നടത്തിയിരുന്നു. എട്ടരക്കോടിയോളം രൂപയും വന്പണമിടപാടുകള് സംബന്ധിച്ച രേഖകളും കണ്ടെടുത്തു. ആദായനികുതി വകുപ്പ് സമര്പ്പിച്ച കുറ്റപത്രത്തിന്റെ അടിസ്ഥാനത്തിലാണ് ഇ.ഡി. കേസ് രജിസ്റ്റര് ചെയ്ത് അന്വേഷണം നടത്തിയത്. ഇ.ഡിയുടെ സമന്സ് റദ്ദാക്കണമെന്ന ശിവകുമാറിന്റെ ഹര്ജി കഴിഞ്ഞ വ്യാഴാഴ്ച കര്ണാടക െഹെക്കോടതി തള്ളിയിരുന്നു. തുടര്ന്നാണു ചോദ്യംചെയ്യലിനായി അദ്ദേഹത്തെ ഇ.ഡി. ഉദ്യോഗസ്ഥര് ഡല്ഹിയിലെ ആസ്ഥാനത്തേക്കു വിളിച്ചുവരുത്തിയത്.
