കൊല്ലം: കരുനാഗപ്പളളിയില് വീണ്ടും ലഹരിമരുന്ന് വേട്ട. മിനിലോറിയില് കടത്താന് ശ്രമിച്ച 50 ലക്ഷത്തോളം വരുന്ന നിരോധിത പുകയില ഉത്പന്നങ്ങള് പിടികൂടി. ലോറി ഡ്രൈവറും സഹായിയും ഓടി രക്ഷപ്പെട്ടു. മൂവാറ്റുപുഴ സ്വദേശിയുടെ ഉടമസ്ഥതയിലുളള ലോറിയിലാണ് പാന്മസാല കടത്തിയതെന്ന് പൊലീസ് കണ്ടെത്തി.
ചകിരിച്ചോര് നിറച്ച ചാക്കുകളില് ഒളിപ്പിച്ചുവെച്ച നിലയിലായിരുന്നു പുകയില പാക്കറ്റുകള് സൂക്ഷിച്ചിരുന്നത്. പുലര്ച്ചെ ദേശീയപാതയില് വെച്ചാണ് പുകയില ഉത്പന്നങ്ങള് പിടികൂടിയത്. കരുനാഗപ്പളളി പൊലീസിന് ലഭിച്ച രഹസ്യവിവരത്തിന്റെ അടിസ്ഥാനത്തില് രാത്രി മുതല് പരിശോധന കര്ശനമാക്കിയിരുന്നു. മിനി ലോറി കൈകാണിച്ചിട്ടും നിര്ത്താതെ പോയതോടെ പൊലീസ് പിന്തുടരുകയായിരുന്നു. തുടര്ന്ന് കരോട്ട ജംഗ്ഷനില് വെച്ച് ലോറി ഉപേക്ഷിച്ച് ഡ്രൈവറും സഹായിയും ഇറങ്ങിയോടി. വാഹനം കസ്റ്റഡിയിലെടുത്ത് പരിശോധിച്ചപ്പോഴാണ് പുകയില ഉത്പന്നങ്ങള് കണ്ടെത്തിയത്. വിപണിയില് അരക്കോടിയോളം വില വരുന്ന പുകയില ഉത്പന്നങ്ങളാണ് പിടിച്ചെടുത്തതെന്ന് പൊലീസ് പറഞ്ഞു.
