മൂവാറ്റുപുഴ: മൂവാറ്റുപുഴ പോലീസ് സ്റ്റേഷന് വിഭജിച്ച് പായിപ്ര ഗ്രാമപഞ്ചായത്തിലെ പേഴയ്ക്കാപ്പിളളി ആസ്ഥാനമായി പുതിയ പോലീസ് സ്റ്റേഷന് അനുവദിക്കണമെന്ന് മുന്‍ എം.എല്‍.എ എല്‍ദോ എബ്രഹാം സര്‍ക്കാരിനോട് ആവശ്യപ്പെട്ടു. 2017 മാര്‍ച്ച് 16-ന് ഇത് സംബന്ധിച്ച് സംസ്ഥാന പോലീസ് മേധാവിക്ക് ജില്ലാ പോലീസ് മേധാവി റിപ്പോര്‍ട്ട് സമര്‍പ്പിച്ചിരുന്നു. കഴിഞ്ഞ എല്‍ഡിഎഫ് സര്‍ക്കാരിന്റെ കാലത്ത് മുന്‍ എം.എല്‍.എ എല്‍ദോ എബ്രഹാം മുഖ്യമന്ത്രിക്ക് നല്‍കിയ കത്തിനെ തുടര്‍ന്നായിരുന്നു നടപടികള്‍ ആരംഭിച്ചത്. 1988-ല്‍ മൂവാറ്റുപുഴ സ്റ്റേഷന് വിഭജിച്ച് വാഴക്കുളം പോലീസ് സ്റ്റേഷന് സ്ഥാപിച്ചു. എറണാകുളം റൂറല്‍ ജില്ലയില്‍ പ്രവര്‍ത്തന പരിധി കൊണ്ടും, വിസ്തൃതികൊണ്ടും മുന്നിലാണ് മൂവാറ്റുപുഴ. വര്‍ദ്ദിച്ചു വരുന്ന ക്രിമിനല്‍ കേസുകള്‍, ട്രാഫിക് സംബന്ധമായ കേസുകള്‍ എന്നിവ കണക്കാക്കിയാല്‍ വിഭജനം അത്യന്താപേക്ഷിതമാണ്.
മൂവാറ്റുപുഴ താലൂക്കിലെ മുളവൂര്‍ ,വെള്ളുര്‍കുന്നം, മാറാടി, വാളകം, ആരക്കുഴ എന്നീ വില്ലേജുകള്‍ ഉള്‍പ്പെടുന്നതാണ് മൂവാറ്റുപുഴ പോലീസ് സ്റ്റേഷന്റെ പ്രവര്‍ത്തനപരിധി. ജനങ്ങള്‍ക്ക് സേവനം സുഗമമാക്കാന്‍ പായിപ്ര പഞ്ചായത്തിനെ പൂര്‍ണ്ണമായും പുതിയ സ്റ്റേഷന് പരിധിയിലേക്ക് കൊണ്ടുവരണം. മൂവാറ്റുപുഴ സ്റ്റേഷനോട് അതിര്‍ത്തി പങ്കിടുന്ന കുന്നത്തുനാട് സ്റ്റേഷന്റെ ഭാഗമായ നെല്ലാട്, മണ്ണൂര്‍, വീട്ടൂര്‍, തൃക്കളത്തൂര്‍ എന്നീ പ്രദേശവും ,കുറുപ്പംപടി സ്റ്റേഷന് പരിധിയിലെ കീഴില്ലവും, കോതമംഗലം താലൂക്കിലെ ഇരമല്ലൂര്‍ വില്ലേജിലെ ചെറുവട്ടൂരും ഉള്‍പ്പെടുത്തി പുതിയ സ്റ്റേഷന് രൂപീകരിക്കാനാകും. പായിപ്ര പഞ്ചായത്ത് സ്റ്റേഷന് ആവശ്യമായ സ്ഥലവും കെട്ടിടവും നല്‍കുന്നതിന് കമ്മിറ്റി തീരുമാനവുമുണ്ട്. പായിപ്ര കവലയുടെ അനുദിന വികസനവും, ജനസംഖ്യയും, കേസുകളുടെ കണക്കുകളും പരിശോധിക്കപ്പെടുമ്പോള്‍ സേവനം കാര്യക്ഷമമാക്കാന്‍ പേഴയ്ക്കാപ്പിള്ളിയില്‍ പോലീസ് സ്റ്റേഷന് അനിവാര്യമാണെന്ന് എല്‍ദോ എബ്രഹാം പറഞ്ഞു. സ്റ്റേഷന്റെ ആവശ്യകത സംബന്ധിച്ച പ്രൊപ്പോസല്‍ ജില്ലാ പോലീസ് മേധാവി സംസ്ഥാന പോലീസ് ആസ്ഥാനത്തിലേക്ക് കൈമാറിയിട്ടുണ്ട്. ഇക്കാര്യത്തില്‍ ഡിപ്പാര്‍ട്ട്മെന്റ് തലത്തില്‍ വിഷയം വീണ്ടും പി.എച്ച്.ക്യൂവിലേക്ക് അറിയിക്കേണ്ട ആവശ്യകത ബോധ്യപ്പെടുത്താന്‍ ആലുവയില്‍ ജല്ലാ പോലീസ് മേധാവിയുമായി മുന്‍ എംഎല്‍എ എല്‍ദോ എബ്രഹാം കൂടിക്കാഴ്ച നടത്തി.
