പാലക്കാട്: പലക്കാട് പല്ലശ്ശനയില്‍ വധൂവരന്‍മാരുടെ തലമുട്ടിച്ച സംഭവത്തില്‍ വനിതാകമ്മീഷനിടപെട്ടതോടെ കൊല്ലങ്കോട് പോലീസ് കേസെടുത്തു. ദേഹോപദ്രവമേല്‍പ്പിക്കല്‍, സ്ത്രീത്വത്തെ അപമാനിക്കല്‍ എന്നീ വകുപ്പുകളാണ് ചുമത്തിയിരിക്കുന്നത്. കേസില്‍ പ്രതിയായ സുഭാഷിനെ ഉടന്‍ അറസ്റ്റ് ചെയ്യുമെന്ന് പോലീസ് പറഞ്ഞു. കേസില്‍ വധൂവരന്‍മാരുടെ മൊഴി പോലീസ് രേഖപ്പെടുത്തി.
ആചാരമെന്ന പേരില്‍ കാട്ടിക്കൂട്ടിയ അതിക്രമം സാമൂഹ്യമാധ്യമങ്ങളില്‍ ചര്‍ച്ചയായിരുന്നു. ഒടുവില്‍ വനിതാകമ്മീഷന്‍ ഇടപെടലിലാണ് പോലീസ് കേസെടുത്തത്. പല്ലശ്ശന സ്വദേശി സച്ചിനും ഭാര്യ മുക്കം സ്വദേശി സജ്ലയ്ക്കുമാണ് വിവാഹ ദിവസം ബന്ധുവിന്റെവക തലയ്ക്ക് ഇടി കിട്ടിയത്. കരഞ്ഞുകൊണ്ട് വീട്ടിലേയ്ക്ക് കയറുന്ന സജ്ലയുടെ ദൃശ്യങ്ങളും വീഡിയോയില്‍ വ്യക്തമായിരുന്നു.
പഴമക്കാരുടെ ആചാര തുടര്‍ച്ചയെന്ന പേരിലാണ് നവദമ്പതിമാരുടെ തലകൂട്ടി മുട്ടിച്ചത്. എന്നാല്‍ അങ്ങിനെയൊരു ആചാരം നാട്ടിലില്ലെന്ന് പല്ലശ്ശന സ്വദേശികള്‍ പലരും തന്നെ പറയുന്നു. കഴിഞ്ഞ തിങ്കളാഴ്ചയായിരുന്നു സച്ചിയുടെയും സജ്ലയുടെയും വിവാഹം. അന്ന് ഗൃഹപ്രവേശനത്തിനിടെയായിരുന്നു സംഭവം .
