കൊല്ലം: യുവാവിനെ മാരകായുധങ്ങളുമായെത്തി ആക്രമിച്ച കേസില്‍ മൂന്ന് പേര്‍ അറസ്റ്റില്‍. ബുധനാഴ്ചയാണ് കേസിനാസ്പദമായ സംഭവം നടക്കുന്നത്.പാവുമ്പ സ്വദേശിയായ അനില്‍ കുമാറിനെ ആളുമാറി പ്രതികള്‍ ആക്രമിക്കുകയായിരുന്നു. ബിനു എന്ന തബൂക്ക് (26), ശ്രീകുട്ടൻ (24) രാജേഷ് (24) എന്നിവരെയാണ് പോലീസ് അറസ്റ്റ് ചെയ്തത്.
കരുനാഗപ്പള്ളി മലയടക്കി ക്ഷേത്രത്തില്‍ ഉത്സവത്തിനെത്തിയ പ്രതികള്‍ക്ക് അവിടെയുണ്ടായ സംഘര്‍ഷത്തില്‍ മര്‍ദനമേറ്റിരുന്നു. പിന്നാലെ അത് വഴി സ്കൂട്ടറിലെത്തിയ അനിലിനെ മര്‍ദിച്ച സംഘത്തിലെ ആളാണെന്ന് തെറ്റിദ്ധരിച്ച്‌ പ്രതികള്‍ ആക്രമിക്കുകയായിരുന്നു.
കമ്പി വടിയും, തടിക്കഷ്ണങ്ങളും കൊണ്ട് അനില്‍കുമാറിനെ മര്‍ദിച്ചവശനാക്കിയശേഷം പ്രതികള്‍ രക്ഷപ്പെടുകയായിരുന്നു. കരുനാഗപ്പള്ളി ഇൻസ്പെക്ടര്‍ വി. ബിജുവിന്‍റെ നേതൃത്വത്തിലുള്ള അന്വേഷണ സംഘമാണ് പ്രതികളെ അറസ്റ്റ് ചെയ്തത്.
