ലൈഫ് മിഷന് പദ്ധതിയിലെ വീട് ഇല്ലാതാക്കരുതെന്ന് ആവശ്യപ്പെട്ട് കത്തെഴുതിയ നീതു ജോണ്സണെ തേടി അനില് അക്കരെ എംഎല്എ. വടക്കാഞ്ചേരി എങ്കേക്കാട് മങ്കര റോഡില് രണ്ടര മണിക്കൂര് കാത്തിരുന്നെങ്കിലും നീതു വന്നില്ല. വ്യത്യസ്തമായൊരു കാത്തിരിപ്പിനാണ് വടക്കാഞ്ചേരി എങ്കേക്കാട് മങ്കര റോഡ് സാക്ഷ്യം വഹിച്ചത്. രണ്ടു മണിക്കൂര് കാത്തിരുന്നിട്ടും ആരും എത്താതായതോടെ കുട്ടിയെ കണ്ടെത്തണം എന്നാവശ്യപ്പെട്ട് എംഎല്എ പൊലീസില് പരാതി നല്കി.
ലൈഫ് മിഷന് പദ്ധതിയിലെ വീട് ഇല്ലാതാക്കരുത് എന്നാവശ്യപ്പെട്ട് പ്രചരിക്കുന്ന കത്തിലെ പെണ്കുട്ടിയെ തേടിയായിരുന്നു എംഎല്എ അനില് അക്കരയുടെ കുത്തിയിരുപ്പ്. നീതു ജോണ്സണ് എന്ന പേരിലാണ് സമൂഹ മാധ്യമങ്ങളില് കത്ത് പ്രചരിച്ചത്. ലൈഫ് മിഷന് പദ്ധതിയിലെ അഴിമതി ആരോപണങ്ങള് പുറത്ത് വന്നതിന് പിന്നാലെയായിരുന്നു ഇത്-
‘സാറിന് കിട്ടിയ ഒരു വോട്ട് ജീവിക്കാനായി ടെക്സ്റ്റൈല് ഷോപ്പില് ജോലി ചെയ്യുന്ന എന്റെ അമ്മയുടെ ആയിരുന്നു. അടച്ചുറപ്പുള്ള വീടെന്നത് ഞങ്ങളെപ്പോലെ നഗരസഭ പുറമ്പോക്കില് ഒറ്റമുറിയില് താമസിക്കുന്നവരുടെ വലിയ സ്വപ്നമാണ്. ഞങ്ങളുടെ കൗണ്സിലര് സൈറാബാനുത്ത ഇടപെട്ട് ലൈഫ് മിഷനില് ലിസ്റ്റില് ഞങ്ങളുടെ പേരും ഉള്പ്പെടുത്തിയിട്ടുണ്ട്. രാഷ്ട്രീയം കളിച്ച് അത് തകര്ക്കരുത് പ്ലീസ്’ – നീതു ജോണ്സണ്, മങ്കര എന്നായിരുന്നു കുറിപ്പ്.
നീതുവിനെ കണ്ടെത്താനുള്ള ശ്രമങ്ങള് പലതും പരാജയപ്പെട്ടതോടെയാണ് വടക്കാഞ്ചേരി ഏങ്കേകാട് മങ്കര റോഡില് രാവിലെ 9 മണി മുതല് പന്തല് കെട്ടി എം.എല്.എ കാത്തിരുന്നത്. നീതുവിന്റെ കത്ത് വായിച്ച് എല്ലാ സഹായവും വാഗ്ദാനം ചെയ്ത് രമ്യ ഹരിദാസ് എംപിയും രംഗത്തെത്തി.
നീതു ജോണ്സണ് എന്നൊരു പെണ്കുട്ടി ഇല്ലെങ്കില് സമൂഹ മാധ്യമം ദുരുപയോഗം ചെയ്യുന്നവര്ക്കെതിരെ നടപടി വേണമെന്നാണ് എംഎല്എയുടെ ആവശ്യം. നീതു ജോണ്സണ് എവിടെ ഉണ്ടെങ്കിലും ഉടന് അനില് അക്കര എംഎല്എയെ കാണണം എന്നാവശ്യപ്പെട്ടായിരുന്നു എംഎല്എയുടെ കാത്തിരുപ്പ്. നീതുവിന് വീട് വക്കാന് നിരവധി ഓഫര് ആണ് എംഎല്എ നല്കുന്നത്.
ലൈഫ് മിഷന് പദ്ധതിക്കെതിരെ അനില് അക്കര ആരോപണങ്ങള് തുടര്ന്നതോടെയാണ് ആഗസ്റ്റ് 23 മുതല് നീതു ജോണ്സണ് എന്ന പെണ്കുട്ടിയുടെ പേരില് ഫേസ്ബുക് പോസ്റ്റ് പ്രചരിച്ച് തുടങ്ങിയത്. സിപിഎം സൈബര് ഇടങ്ങളില് ആണ് പോസ്റ്റ് പ്രചരിച്ചത്.
രണ്ടര മണിക്കൂര് കാത്തിരുന്നെങ്കിലും നീതു വന്നില്ല. ഇതോടെ നീതുവിനെ കണ്ടെത്താനായി വടക്കാഞ്ചേരി പോലീസില് എം.എല്.എ പരാതി നല്കി. നീതു എന്ന പേരില് ഒരു കുട്ടി ഇല്ലെന്നും എംഎല്എ ക്കെതിരെ സിപിഎം പടച്ചു വിട്ട പോസ്റ്റ് ആണ് ഇതെന്നുമാണ് കോണ്ഗ്രസ് പ്രവര്ത്തകര് അടക്കം പറയുന്നത്. അതേസമയം ലൈഫ് മിഷന് പദ്ധതിയുടെ ഗുണഭോക്താക്കള് എന്ന് കാണിച്ച് പി.ആര്.ഡി നടത്തുന്ന പ്രചരണം വ്യാജമാണെന്നും അനില് അക്കര ആരോപിച്ചു.
