കോതിയില്‍ ശുചിമുറി മാലിന്യ സംസ്‌കരണ പ്ലാന്റ് നിര്‍മാണത്തിനെതിരെ നാട്ടുകാരുടെ പ്രതിഷേധം തുടരുന്നു. നിര്‍മാണം തടയാനെത്തിയവരെ പൊലീസ് തടഞ്ഞു. വിഷയം നിയമസഭയില്‍ ഉന്നയിക്കുമെന്ന് ടി. സിദ്ദിഖ് എം.എല്‍.എ പറഞ്ഞു.
ശുചിമുറി മാലിന്യ പ്ലാന്റിന്റെ അതിര് കെട്ടുന്ന പ്രവര്‍ത്തിയാണ് ഇന്നു വീണ്ടും തുടങ്ങിയത്. ഇതിനിടെയാണ് നാട്ടുകാര്‍ പ്രതിഷേധം വീണ്ടും ആരംഭിച്ചത്. ഇതിനിടെ ടി. സിദ്ദിഖ് എം.എല്‍.എ സമരക്കാരുമായി ചര്‍ച്ച നടത്തി. ഇതിനു പിന്നാലെ പ്ലാന്റ് നിര്‍മാണം തടയുമെന്ന് പറഞ്ഞ് നാട്ടുകാര്‍ പ്രവര്‍ത്തി നടക്കുന്ന പ്രദേശത്ത് കടന്നു. ഇവരെ പൊലീസ് തടയാന്‍ ശ്രമിച്ചു. കോംപൗണ്ടില്‍ നിന്ന് സമരക്കാരെ അറസ്റ്റ് ചെയ്തുകൊണ്ടു പോയതായി നാട്ടുകാര്‍ പറയുന്നു. പൊലീസ് ക്രൂരമായി മര്‍ദിച്ചതായും ആരോപണമുണ്ട്.
ജനസാന്ദ്രതയേറിയ പ്രദേശത്തു തന്നെ ഈ പദ്ധതി കൊണ്ടുവരാനുള്ള ദുര്‍വാശി ജനങ്ങളോടുള്ള യുദ്ധപ്രഖ്യാപനമാണെന്ന് ടി. സിദ്ദിഖ് എം.എല്‍.എ കുറ്റപ്പെടുത്തി. ഇത് നടക്കുന്ന കാര്യമല്ല. അടുത്ത മാസം അഞ്ചിന് ആരംഭിക്കുന്ന നിയമസഭാ സമ്മേളനത്തില്‍ വിഷയം വീണ്ടും ഉന്നയിക്കുമെന്നും സിദ്ദിഖ് അറിയിച്ചു.
പദ്ധതിയുമായി മുന്നോട്ടു പോകാന്‍ ഹൈക്കോടതിയുടെ അനുമതി ലഭിച്ചതിനു പിന്നാലെയാണ് ഇന്ന് കോര്‍പറേഷന്‍ നിര്‍മാണ പ്രവര്‍ത്തികള്‍ പുനരാരംഭിച്ചത്. ഇതിനെതിരെ ഇന്നലെ കോതി പ്രദേശവാസികള്‍ ഹര്‍ത്താല്‍ ആചരിച്ചിരുന്നു. കോര്‍പറേഷനിലെ മുഖദാര്‍, കുറ്റിച്ചിറ, ചാലപ്പുറം ഡിവിഷനുകളിലെ കുണ്ടുങ്ങല്‍, ഇടിയങ്ങര, പള്ളിക്കണ്ടി, കുത്തുകല്ല്, നൈനാംവളപ്പ്, കോതി എന്നിവിടങ്ങളിലാണ് ജനകീയ സമിതി ഹര്‍ത്താലിന് ആഹ്വാനം ചെയ്തത്.
പദ്ധതി പ്രദേശത്ത് ചുറ്റുമതില്‍ നിര്‍മിക്കാനുള്ള കോര്‍പറേഷന്‍ നീക്കത്തിനെതിരെ ഇന്നലെ ശക്തമായ പ്രതിഷേധമാണ് നടന്നത്. 42 പേരെ പൊലീസ് അറസ്റ്റ് ചെയ്തിരുന്നു. എന്നാല്‍, പദ്ധതിയില്‍ നിന്ന് പിന്മാറില്ലെന്നാണ് കോര്‍പറേഷന്‍ നിലപാട്.
