ഇടുക്കിയില്‍ ഇരട്ട വോട്ട് പിടികൂടി പോളിംഗ് ഉദ്യോ?ഗസ്ഥര്‍. ഇടുക്കി ചെമ്മണ്ണാര്‍ സെന്റ് സേവിയേഴ്‌സ് ഹയര്‍സെക്കണ്ടറി സ്‌കൂളിലെ 57-ാം നമ്പര്‍ ബൂത്തിലെത്തിയ ആളെയാണ് ഉദ്യോഗസ്ഥര്‍ കണ്ടെത്തിയത്. തമിഴ്‌നാട്ടില്‍ വോട്ട് രേഖപ്പെടുത്തിയ ശേഷം വിരലിലെ മഷി പൂര്‍ണമായും മായ്ക്കുവാന്‍ സാധിക്കാതെ എത്തിയ വനിതയെ ആണ് ഉദ്യോഗസ്ഥര്‍ തിരിച്ചയച്ചത്. ഇവരുടെ ഭര്‍ത്താവ് നേരത്തെ എത്തി വോട്ട് രേഖപ്പെടുത്തി മടങ്ങിയിരുന്നു.
മലപ്പുറം തിരൂരങ്ങാടിയില്‍ യുവാവിന്റെ വോട്ട് മറ്റൊരാള്‍ ചെയ്തതായി പരാതി. തിരൂരങ്ങാടി സ്വദേശി കുട്ടശ്ശേരി മുസ്തഫയാണ് പരാതിക്കാരന്‍. തിരൂരങ്ങാടി നഗരസഭ പരിധിയിലെ പന്താരങ്ങാടി മിഷ്‌കത്തുല്‍ ഉലൂം സുന്നി ഹയര്‍സെക്കന്‍ഡറി മദ്രസയിലെ 51 ആം നമ്പര്‍ ബൂത്തിലെ വോട്ടറാണ് മുസ്തഫ. വോട്ട് ചെയ്യാന്‍ എത്തിയ മുസ്തഫയോട് ഉദ്യോഗസ്ഥര്‍ വോട്ട് ചെയ്യാന്‍ കഴിയില്ലന്ന് അറിയിക്കുകയായിരുന്നു. മുസ്തഫ പോളിംഗ് ബൂത്തില്‍ കുത്തിയിരുന്ന് പ്രതിഷേധിക്കുകയാണ്.
പട്ടാമ്പിയില്‍ മരിച്ചയാളുടെ വോട്ട് ചെയ്യാന്‍ ശ്രമം നടന്നിരുന്നു. കൊപ്പം മുതുതല എയ്ഡഡ് അപ്പര്‍ പ്രൈമറി സ്‌കൂളിലാണ് മരിച്ചയാളുടെ വോട്ട് ചെയ്യാന്‍ ശ്രമം നടന്നത്. പര്‍ദ്ദ ധരിച്ച് എത്തിയ സ്ത്രീയാണ് ഒരു മാസം മുന്‍പ് മരിച്ചയാളുടെ വോട്ട് രേഖപ്പെടുത്താന്‍ ശ്രമിച്ചത്.
