പ്രധാനമന്ത്രി നരേന്ദ്രമോദിയെ ബിഹാറില് വെച്ച് ആക്രമിക്കാന് പോപ്പുലര് ഫ്രണ്ട് പദ്ധതി തയ്യാറാക്കിയിരുന്നതായി എന്ഫോഴ്സ്മെന്റ് ഡയറക്ടറേറ്റ്. ജൂലൈ 12 ന് പട്നയില് നടന്ന റാലിക്കിടെ പ്രധാനമന്ത്രിയെ ആക്രമിക്കാനായിരുന്നു പദ്ധതി. ഇതിനായി പ്രത്യേക പരിശീലന ക്യാംപ് പോപ്പുലര് ഫ്രണ്ട് സംഘടിപ്പിച്ചിരുന്നതായും ഇഡി ആരോപിച്ചു. കേരളത്തില് നിന്ന് വ്യാഴാഴ്ച ഇഡി അറസ്റ്റ് ചെയ്ത ഷഫീഖ് പിയുടെ റിമാന്ഡ് റിപ്പോര്ട്ടിലാണ് ഇക്കാര്യം വ്യക്തമാക്കിയിട്ടുള്ളത്.
പ്രധാനമന്ത്രിക്ക് പുറമെ ഉത്തര്പ്രദേശിലെ ചില പ്രമുഖര്ക്കും തന്ത്രപ്രധാന സ്ഥലങ്ങള്ക്കുമെതിരെ ഒരേസമയം ആക്രമണം നടത്താന് ഭീകരവാദ സംഘങ്ങള്ക്ക് രൂപം നല്കിയതായും റിമാന്ഡ് റിപ്പോര്ട്ടില് പറയുന്നു.
മലയാളിയായ ഷഫീഖിനെതിരെ ഗുരുതര ആരോപണമാണ് റിമാന്ഡ് റിപ്പോര്ട്ടിലുള്ളത്. ഖത്തറിലെ ഒരു കമ്പനിയിലായിരുന്നു ഇയാള് ജോലി ചെയ്തിരുന്നത്. ഈ ബന്ധങ്ങള് വഴിയാണ് ഭീകര പ്രവര്ത്തനങ്ങള്ക്കുള്ള പണം സമാഹരിച്ചത്. ആകെ 120 കോടി രൂപ വിദേശത്ത് നിന്നും ഭീകര പ്രവര്ത്തനങ്ങള്ക്ക് വേണ്ടി സമാഹരിച്ചുവെന്നും ഇതിനുള്ള തെളിവുകള് ലഭിച്ചെന്നും ഇഡി റിപ്പോര്ട്ടില് പറയുന്നു.
രാജ്യത്ത് കഴിഞ്ഞ ദിവസങ്ങളില് കേന്ദ്ര സേനയുടെ സഹായത്തോടെ പോപ്പുലര് ഫ്രണ്ട് കേന്ദ്രങ്ങളില് നടന്ന പരിശോധനയില് എന്ഐഎക്ക് ഒപ്പം ഇഡിയും പങ്കാളിയായിരുന്നു. 45 പേരാണ് എന്ഐഎയുടെ കസ്റ്റഡിയിലുള്ളത്. ഇഡി നാല് പേരെയും കസ്റ്റഡിയിലെടുത്തിരുന്നു. ഇവരില് മൂന്ന് പേര് ദില്ലിയില് നിന്നുള്ളയാളും ഒരാള് കേരളത്തില് നിന്നുള്ള ഷഫീഖ് പിയാണ് എന്നയാളുമാണെന്നാണ് വിവരം. 2018 മുതല് ആരംഭിച്ച ഒരു കേസിലാണ് പ്രതികളെ പിടികൂടിയത്. ഇഡി കസ്റ്റഡിയിലുള്ള നാല് പേരുടെയും ഭാഗത്തേക്ക് കൂടുതല് അന്വേഷണം വേണമെന്നാണ് ഇഡി ആവശ്യം.
രാജ്യത്ത് വിവിധയിടങ്ങളില്നിന്ന് അറസ്റ്റിലായ പോപ്പുലര് ഫ്രണ്ട് നേതാക്കളെ ചോദ്യം ചെയ്യുന്നത് ദില്ലി എന്ഐഎ ആസ്ഥാനത്ത് തുടരുകയാണ്. ഇന്നലെ 8 മണിക്കൂറിലധികമാണ് പ്രതികളെ ചോദ്യം ചെയ്തത്. റെയ്ഡില് പിടിച്ചെടുത്ത ഡിജിറ്റല് ഉപകരണങ്ങള് ഫോറന്സിക് പരിശോധനയ്ക്ക് അയച്ചു. തിങ്കളാഴ്ച പിഎഫ്ഐ നേതാക്കളെ വീണ്ടും കോടതിയില് ഹാജരാക്കും. അതിനിടെ എന്ഐഎ പരിശോധനയ്ക്കും നേതാക്കളുടെ അറസ്റ്റിനും പിന്നാലെ കേരളത്തില് നടന്ന പോപ്പുലര് ഫ്രണ്ട് ഹര്ത്താലില് കേന്ദ്രം റിപ്പോര്ട്ട് തേടി. കേന്ദ്ര ആഭ്യന്തര മന്ത്രാലയമാണ് സംസ്ഥാന സര്ക്കാരിനോട് റിപ്പോര്ട്ട് ആവശ്യപ്പെട്ടത്.
