സംസ്ഥാന വനിതാ കമ്മീഷന് പിരിച്ചു വിടണമെന്ന് മുന്‍ വനിതാകമ്മീഷന്‍ അംഗവും ബിജെപി സംസ്ഥാന വൈസ് പ്രസിഡന്റുമായ ഡോ. പ്രമീളദേവി ആവശ്യപ്പെട്ടു. സ്ത്രീ വിരുദ്ധമായ സമീപനവും നിലപാടുമുള്ള ജോസഫൈന്‍ വനിതാ കമ്മീഷന് അദ്ധ്യക്ഷയായി തുടരുന്നത് കേരളത്തിന് നാണക്കേടാണ്. ദുരിതം അനുഭവിക്കുന്ന പരാതിക്കാരിയോട് അത് നിങ്ങള്‍ അനുഭവിച്ചോളൂവെന്ന് പറഞ്ഞ കമ്മീഷന് അദ്ധ്യക്ഷ സ്ത്രീത്വത്തെ മുഴുവന്‍ അപമാനിക്കുകയായിരുന്നു.
ഇവര്‍ക്കെതിരെ പൊലീസ് കേസെടുക്കണം. നിരാലംബരായ സ്ത്രീകളാണ് കമ്മീഷന് മുമ്പാകെ വരുന്നതെന്നിരിക്കെ അവരോട് ഇത്രയും ഹീനമായ വാക്കുകളുപയോഗിച്ചത് മാപ്പര്‍ഹിക്കാത്ത തെറ്റാണ്. വനിതാ കമ്മീഷന് കൂട്ടു ഉത്തര വാദിത്വമാണെന്നതിനാല്‍ അംഗങ്ങള്‍ എല്ലാവരും രാജിവെക്കണം. രാജിവെച്ചില്ലെങ്കില്‍ കമ്മീഷനെ മുഖ്യമന്ത്രി പിരിച്ചു വിടണം.
സ്ത്രീയുടെ സുരക്ഷിതത്വവും അഭിമാനകരമായ ജീവിതവും വനിതാകമ്മീഷന്റെ ഉത്തരവാദിത്വമാണെന്നിരിക്കെ പീഡനങ്ങളെ ന്യായീകരിക്കുകയാണ് ജോസഫൈന്‍. പാര്‍ട്ടി സംവിധാനത്തിന് കീഴിലാണ് ഭരണഘടനാ സ്ഥാപനമായ വനിതാ കമ്മീഷനെന്നാണ് അവര്‍ പറയുന്നത്. കടത്തില്‍ മുങ്ങിത്താഴുന്ന സംസ്ഥാനത്ത് ഇങ്ങനെയുള്ളവരെ തീറ്റിപ്പോറ്റണോയെന്ന് സര്‍ക്കാര്‍ തീരുമാനിക്കണം. ജോസഫൈന്‍ അന്വേഷിച്ച കേസുകള്‍ പുനരന്വേഷണത്തിന് വിധേയമാക്കണമെന്നും പ്രമീളദേവി ആവശ്യപ്പെട്ടു.
