തലസ്ഥാനത്തെ ഞെട്ടിച്ച് ഡല്ഹി വനിതാ കമ്മിഷന് അധ്യക്ഷ സ്വാതി മാലിവാളിനു നേരെ ആക്രമണം. വ്യാഴാഴ്ച പുലര്ച്ചെ മൂന്നോടെ, രാത്രികാലത്ത് സ്ത്രീകള് നേരിടുന്ന പ്രശ്നങ്ങള് പരിശോധിക്കുന്നതിനിടെ ഡല്ഹി എയിംസിനടുത്താണ് സംഭവം.
കാറില് സ്ഥലത്തെത്തിയ സമൂഹ വിരുദ്ധ സംഘത്തിലെ അംഗമായ വിഹാര് സ്വദേശി ഹരീഷ് ചന്ദ്ര (47) സ്വാതിയോട് അസഭ്യം പറഞ്ഞു. കാറില് കയറാന് ആവശ്യപ്പെടുകയും ചെയ്തു. ഇത് നിരസിക്കുകയും പ്രതികരിക്കുകയും ചെയ്തപ്പോള് മദ്യലഹരിയിലായിരുന്ന ഹരീഷ് കാറോടിച്ചു പോയി.
അല്പസമയത്തിനുള്ളില് മടങ്ങിയെത്തി കാറില് കയറാന് നിര്ബന്ധിച്ചു. എന്നാല് വിസമ്മതിച്ചപ്പോള് ഇവരെ കാറിലേക്ക് വലിച്ച്, കൈ ഡോറില് കുടുക്കി വാഹനം മുന്നോട്ടു കൊണ്ടുപോയി എന്നാണ് പരാതി. ഏകദേശം പത്ത് മീറ്ററോളം വാഹനം മുന്നോട്ട് പോവുകയും ഇവരെ റോഡിലൂടെ വലിച്ചിഴക്കുകയും ചെയ്തു.
ഉടന് സ്ഥലത്തെത്തിയ പൊലീസ് പ്രതിയെ അറസ്റ്റ് ചെയ്യുകയായിരുന്നു. സ്വാതി മലിവാളിന്റെ പരിക്ക് സാരമുള്ളതല്ലെന്ന് ആശുപത്രി വൃത്തങ്ങള് വ്യക്തമാക്കി.