തിരുവനന്തപുരം മേയര് ആര്യാ രാജേന്ദ്രനെതിരെ യുഡിഎഫ് കൗണ്സിലര്മാര് നഗരസഭയില് ശുദ്ധികലശം നടത്തി. നഗരസഭയിലെ മുഴുവന് നിയമനങ്ങളുടേയും അധികാരം ജില്ലാ സെക്രട്ടിക്ക് മേയര് കൈമാറിയെന്ന് യുഡിഎഫ് ആരോപിച്ചു. തിരുവനന്തപുരം നഗരസഭയില് അഴിമതി നടക്കുകയാണെന്നും യുഡിഎഫ് ആരോപിച്ചു.
തിരുവനന്തപുരം നഗരസഭാ കത്ത് വിവാദത്തില് പ്രതിപക്ഷം ഇന്ന് മുതല് സമരം കടുപ്പിക്കുകയാണ്. നിയമന കത്ത് വിവാദത്തിന്റെ പശ്ചാത്തലത്തില് വിളിച്ചപ്രത്യേക കൗണ്സില് യോഗം പരാജയപ്പെട്ടതോടെ സമരം ഒരു പടി കൂടെ കടന്ന് ശക്തമാക്കാന് ഒരുങ്ങുകയാണ് ബിജെപിയും യുഡിഎഫും.
ബി.ജെ.പി നഗരസഭയ്ക്ക് അകത്തും പുറത്തും നടത്തുന്ന സമരം കൂടുതല് ശക്തമാക്കാന് തീരുമാനിച്ചു. നിയമന പട്ടിക ഇനിയും പുറത്ത് വരുമെന്നും മേയര് രാജി വയ്ക്കുന്നത് വരെ സമരവുമായി മുന്നോട്ടുപോകുമെന്നും ബി.ജെ.പി നേതൃത്വം വ്യക്തമാക്കി.
നഗരസഭയ്ക്കകത്ത് യുഡിഎഫ് കൗണ്സിലര്മാരുടെയും പുറത്ത് കോണ്ഗ്രസിന്റെയും സമരം ഇന്നും പുരോഗമിക്കും. സമരം സംസ്ഥാന വ്യാപകമാക്കാനാണ് യൂത്ത് കോണ്ഗ്രസ് തീരുമാനം. അതേ സമയംപ്രാഥമിക അന്വേഷണ റിപ്പോര്ട്ട് ക്രൈംബ്രാഞ്ച് ഇത് വരെ സംസ്ഥാന പൊലീസ് മേധാവിക്ക് കൈമാറിയിട്ടില്ല. വിജിലന്സ് അന്വേഷണവും മന്ദഗതിയിലാണ്.
