മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം ശിവശങ്കറിനെ ഇന്നും എംആര്ഐ സ്കാനിംഗിന് വിധേയനാക്കും. കലശലായ നടുവേദനയുണ്ടെന്ന് ശിവശങ്കര് ഡോക്ടര്മാരോട് പറഞ്ഞു. മെഡിക്കല് ബോര്ഡ് ചേര്ന്ന് ശിവശങ്കറിന്റെ ആരോഗ്യസ്ഥിതി വിലയിരുത്തും. ഇതിന് ശേഷമാകും തുടര്ചികിത്സ സംബന്ധിച്ച തീരുമാനമുണ്ടാകുക. അതേസമയം, ശിവശങ്കറിന്റെ ആരോഗ്യനില തൃപ്തികരമെന്ന് ഡോക്ടര്മാര് അറിയിച്ചു.
നിലവില് ശിവശങ്കര് ഐസിയുവില് തന്നെ തുടരട്ടെയെന്നാണ് ഡോക്ടര്മാരുടെ അഭിപ്രായം. ഡോക്ടര്മാരുടെ തീരുമാനത്തിന് അനുസരിച്ചാകും കസ്റ്റംസിന്റെ തുടര്നടപടികളും. മെഡിക്കല് ബോര്ഡിന്റെ തീരുമാനവും ശിവശങ്കറിന്റെ നീക്കങ്ങളും കസ്റ്റംസ് നിരീക്ഷിക്കുന്നുണ്ട്. ഇന്നലെയാണ് സ്വകാര്യ ആശുപത്രിയില് നിന്നും മെഡിക്കല് കോളേജ് ആശുപത്രിയിലേക്ക് ശിവശങ്കറിനെ മാറ്റിയത്.
അതേസമയം, എം ശിവശങ്കര് നാളെ ഹൈക്കോടതിയെ സമീപിക്കും. തിരുവനന്തപുരം മെഡിക്കല് കോളേജ് ആശുപത്രിയിലെ ഓര്ത്തോ ഐസിയുവില് കഴിയുന്ന ശിവശങ്കറിനായി അദ്ദേഹത്തിന്റെ അഭിഭാഷകര് മുന്കൂര് ജാമ്യാപേക്ഷ തയാറാക്കി. കസ്റ്റംസ് രജിസ്റ്റര് ചെയ്ത സ്വര്ണക്കടത്ത്, ഡോളര് ഇടപാട്, ഈന്തപ്പഴവും മതഗ്രന്ധങ്ങളും വിതരണം ചെയ്തതിലെ അന്വേഷണം ഇവയെല്ലാം ചൂണ്ടിക്കാട്ടിയാകും ഹര്ജി നല്കുക.
