താലിബാന് ഭരണം പിടിച്ചെടുത്ത അഫ്ഗാനിസ്ഥാനിലെ ജനതയുടെ ഭാവിയില് ആശങ്ക പ്രകടിപ്പിച്ച് നൊബേല് പുരസ്താര ജേതാവും സ്ത്രീ വിദ്യാഭ്യാസ ഉന്നമന പ്രവര്ത്തകയുമായ മലാല യൂസഫ്സായ്. അഫ്ഗാനിനെ സ്ത്രീകള്, കുട്ടികള് എന്നിവരുടെ സുരക്ഷയില് കടുത്ത ആശങ്ക രേഖപ്പെടുത്തിയ മലാല വിഷയത്തില് ലോക നേതാക്കള് അടിയന്തരമായി ഇടപെടണമെന്നും ആവശ്യപ്പെട്ടു.
‘അഫ്ഗാനിസ്ഥാനിലെ സ്ത്രീകളുടെ അവകാശങ്ങള്ക്കായി പ്രവര്ത്തിച്ച് വന്ന ഏതാനും പേരുമായി സംസാരിക്കാന് കഴിഞ്ഞിരുന്നു. ഇനിയുള്ള അവരുടെ ജീവിതം എങ്ങനെയായിരിക്കുമെന്ന് പോലും ഉറപ്പില്ലെന്ന ആശങ്കയാണ് അവര് പങ്കുവെച്ചത്. അഫ്ഗാന് അഭയാര്ഥികളെ രാജ്യത്തേക്ക് പ്രവേശിപ്പിക്കണമെന്നും മലാല ആവശ്യപ്പെട്ടു. ഇത്തരത്തില് പാകിസ്താനിലേക്ക് എത്തുന്ന അഭയാര്ഥി കുട്ടികള്ക്ക് വിദ്യാഭ്യാസവും സുരക്ഷിതത്വവും സംരക്ഷണവും ലഭ്യമാണെന്നും അവരുടെ ഭാവി നഷ്ടപ്പെടുന്നില്ലെന്നും ഉറപ്പു വരുത്തണമെന്നും ആവശ്യപ്പെട്ട് പാക് പ്രധാനമന്ത്രി ഇമ്രാന് ഖാന് കത്തയച്ചതായും മലാല യൂസഫ് സായ് പറഞ്ഞു.
അഫ്ഗാന് ജനതയെ സംരക്ഷിക്കാന് യുഎസ് പ്രസിഡന്റ് ജോ ബൈഡന് ഒരുപാട് കാര്യങ്ങള് ചെയ്യാനാവും. വിഷയത്തില് ധീരമായ നടപടി സ്വീകരിക്കണമെന്നും യൂസഫ് സായ് ആവശ്യപ്പെട്ടു. വിഷയത്തിന്റെ ഗുരുതരാവസ്ഥ ബോധിപ്പിക്കാന് ആഗോള നേതാക്കളുമായി ബന്ധപ്പെടാന് ശ്രമിച്ചു കൊണ്ടിരിക്കയാണ് എന്നും മലാല വ്യക്തമാക്കി. അഫ്ഗാനിലേത് അടിയന്തിരമായ ഇടപെടല് വേണ്ട ഒരു മാനുഷിക പ്രതിസന്ധിയാണ്, ആ ജനത ഇപ്പോള് സഹായവും പിന്തുണയും ആവശ്യപ്പെടുകയാണെന്നും മലാല പ്രതികരിച്ചു. തിങ്കളാഴ്ച രാത്രി ബിബിസി ന്യൂസ് നൈറ്റില് സംസാരിക്കുകയായിരുന്നു മലാല.
തന്റെ പതിനൊന്നാം വയസ്സില് താലിബാന് ആക്രമണത്തില് ഗുരുതര പരിക്കേറ്റ സംഭവത്തിന് പിന്നാലെയാണ് മലാല ലോക ശ്രദ്ധയിലെത്തുന്നത്. 2012 ഒക്ടോബര് 9നു നടന്ന വധശ്രമത്തില് മലാലയുടെ തലയ്ക്കും കഴുത്തിനും ഗുരുതരമായ പരിക്കേറ്റിരുന്നു. വധശ്രമത്തിന്റെ ഉത്തരവാദിത്തം താലിബാന് ഏറ്റെടുക്കുകയും ചെയ്തു.
മലാലയെ ഇംഗ്ലണ്ടില് എത്തിച്ച് വിദഗ്ദ ചികില്സയിലൂടെയാണ് ജീവിതത്തിലേക്ക് തിരിച്ചെത്തിയത്. പിന്നാലെ ആഗോള തലത്തില് പെണ്കുട്ടികളുടെ വിദ്യാഭ്യാസ അവകാശ പ്രവര്ത്തനങ്ങള്ക്ക് വേണ്ടി പ്രവര്ത്തിക്കുകയും ചെയ്തു മലാല. 2014 ലെ സമാധാനത്തിനുള്ള നോബല് സമ്മാനാര്ഹയായ ഈ പുരസ്കാരം നേടുന്ന ഏറ്റവും പ്രായം കുറഞ്ഞ വ്യക്തിയുമാണ്.