സംസ്ഥാനത്തെ സര്ക്കാര് വിദ്യാലയങ്ങളില് പെണ്കുട്ടികള്ക്കും ആണ്കുട്ടികള്ക്കും ഒരേ തരത്തിലുള്ള യൂണിഫോം രീതി നടപ്പാക്കുന്ന, ജെന്ഡര് ന്യൂട്രല് യൂണിഫോം പദ്ധതിയുടെ ഔദ്യോഗിക ഉദ്ഘാടനം ഉന്നത വിദ്യാഭ്യാസ മന്ത്രി ഇന്ന് നിര്വഹിക്കും. ഇതിനെതിരെ പ്രതിഷേധിച്ചു കൊണ്ട് വിവിധ സംഘടനകളാണ് രംഗത്ത് വന്നത്.
വസ്ത്രധാരണ രീതി ഏകീകരിക്കുന്നതിനെതിരെ വിവിധ മുസ്ലിം സംഘടനകളുടെ നേതൃത്വത്തിലുള്ള കോ ഓര്ഡിനേഷര് കമ്മിറ്റി രംഗത്തെത്തിയിട്ടുണ്ട്. കോഴിക്കോട് ബാലുശ്ശേരി ഗവണ്മെന്റ് ഗേള്സ് ഹയര്സെക്കന്ററി സ്കൂളില്ലാണ് ജെന്ഡര് ന്യൂട്രല് യൂണിഫോം സംവിധാനം നടപ്പിലായതിനെചൊല്ലി വിവാദം കനക്കുന്നതിനിടെയാണ് ഉദ്ഘാടനം.
സ്കൂളിലേക്ക് പ്രതിഷേധ മാര്ച്ച് സംഘടിപ്പിക്കുമെന്ന് വിവിധ സംഘടനകള് അറിയിച്ചു. എംഎസ്എഫ് ,യൂത്ത് ലീഗ് എന്നീ സംഘടനകളുടെ നേതൃത്വത്തിലാണ് പ്രതിഷേധം.
ജെന്ഡര് ന്യൂട്രല് യൂണിഫോം എന്ന ആശയം നടപ്പാക്കുന്ന, സംസ്ഥാനത്തെ ആദ്യത്തെ ഹയര്സെക്കന്ററി സ്കൂളാണ് ബാലുശ്ശേരി ജി.ജി.എച്ച്.എസ്.എസ്. ആണ്കുട്ടികളുടെ വസ്ത്രധാരണ രീതി പെണ്കുട്ടികളില് അടിച്ചേല്പ്പിച്ചിരിക്കുകയാണെന്ന് പ്രതിഷേധക്കാര് വാദിക്കുന്നു. ഇക്കാര്യം ചൂണ്ടിക്കാട്ടി വിദ്യാഭ്യാസ മന്ത്രിക്കും മുഖ്യമന്ത്രിക്കും സംഘടനകള് നിവേദനം നല്കുകയും ചെയ്തിട്ടുണ്ട്. രക്ഷിതാക്കളുമായും വിദ്യാര്ഥികളുമായും ആലോചിച്ചെടുത്ത തീരുമാനമാണിതെന്നാണ് സ്കൂള് അധികൃതര് പറയുന്നത്.
