സംസ്ഥാന സര്‍ക്കാരിനെതിരെ വീണ്ടും രൂക്ഷ വിമര്‍ശനവുമായി കിറ്റെക്സ് എംഡി സാബു എം ജേക്കബ്. വ്യവസായ വകുപ്പ് പൊട്ടക്കിണറ്റിലെ തവളയെന്ന് പരിഹസിച്ച സാബു എം ജേക്കബ് തെലങ്കാനയില്‍ കിറ്റെക്സിന് രാജകീയ സ്വീകരണമാണ് ലഭിച്ചതെന്നും പറഞ്ഞു.
മറ്റു സംസ്ഥാനങ്ങളില്‍ എന്തു നടക്കുന്നുവെന്ന് കേരളം അറിയുന്നില്ല. തെലങ്കാനയില്‍ കണ്ടത് രാഷ്ട്രീയ നേതാക്കളെയല്ല, സിഇഒയെ കണ്ട പ്രതീതിയായിരുന്നുവെന്ന് സാബു ജേക്കബ് പറഞ്ഞു. ഏതു പ്രശ്‌നത്തിനും ഉടന്‍ പരിഹാരം സ്വീകരിക്കുന്ന പ്രഫഷനല്‍ സമീപനമായിരുന്നു മന്ത്രിയുടേത്. കേരളമാണ് ഏറ്റവും വ്യവസായ സൗഹൃദമെന്ന് വെറുതെ പറയുന്നുതാണ്. കേരളം പൊട്ടക്കിണറ്റില്‍ വീണ തവളയെന്ന് വിമര്‍ശനം. തെലങ്കാനയില്‍ മാലിന്യ സംസ്‌കരണം മുതല്‍ സര്‍ക്കാര്‍ ഏറ്റെടുക്കാമെന്ന് വാഗ്ദാനം നല്‍കി. പരിശോധനകള്‍ മുന്‍കൂര്‍ അറിയിച്ചു മാത്രമേ നടത്തൂ. പത്തു വര്‍ഷത്തേക്ക് ഒറ്റ ലൈസന്‍സ് മാത്രമാണ് വേണ്ടെതെന്നും അദ്ദേഹം പറഞ്ഞു.
‘കേരളത്തില്‍ 30 ദിവസത്തിനുള്ളില്‍ നടത്തിയത് 11 റെയ്ഡുകളാണ്. തെലങ്കാനയില്‍ അത്തരത്തില്‍ ഒരു പ്രശ്നവുമുണ്ടാകില്ലെന്ന് സര്‍ക്കാര്‍ ഉറപ്പു നല്‍കിയിട്ടുണ്ട്. രണ്ടോ മൂന്നോ വര്‍ഷത്തിനുള്ളില്‍ ഒരു പരിശോധന നടന്നാല്‍ തന്നെ മുന്‍കൂട്ടി അറിയിക്കും. എന്തെങ്കിലും അപാകതകള്‍ കണ്ടെത്തിയാല്‍ തന്നെ അത് പരിഹരിക്കാനുള്ള നടപടികളാകും സ്വീകരിക്കുക എന്നും ഉറപ്പുതന്നിട്ടുണ്ട്’. സാബു ജേക്കബ് പറഞ്ഞു.
‘സിംഗിള്‍ വിന്‍ഡോ ക്ലിയറന്‍സ് നടപ്പിലാക്കിയെന്ന് കേരളം കൊട്ടിഘോഷിക്കുകയാണ്. പക്ഷേ പല സംസ്ഥാനങ്ങളും 20-25 വര്‍ഷങ്ങള്‍ക്ക് മുന്‍പ് നടപ്പിലാക്കിയ പദ്ധതികളൊക്കെ കേരളം ഇപ്പോള്‍ ചര്‍ച്ച ചെയ്യുന്നേ ഉള്ളൂ. വ്യവസായം നടത്താന്‍ ആവശ്യമായ സ്ഥലം, വെളളം, വൈദ്യുതി അടക്കം സംവിധാനങ്ങള്‍ തെലങ്കാന സര്‍ക്കാര്‍ വാഗ്ദാനം ചെയ്തിട്ടുണ്ട്.
വ്യവസായിയുടെ പ്രശ്നങ്ങള്‍ക്ക് ഉടന്‍ പരിഹാരം നല്‍കുന്നയാളാണ് തെലങ്കാന വ്യവസായ മന്ത്രി. 53 വര്‍ഷമായി കേരളത്തില്‍ വ്യവസായം നടത്താനെടുത്ത പ്രയത്നം മറ്റ് സംസ്ഥാനങ്ങളില്‍ ആയിരുന്നെങ്കില്‍ ഇതിലും ലാഭം ഉണ്ടാകുമായിരുന്നു എന്നും കിറ്റെക്സ് എംഡി സാബു ജേക്കബ് പ്രതികരിച്ചു.
