സ്വാതന്ത്ര്യ ദിനത്തിന്റെ ഭാഗമായി ആഗസ്റ്റ് 14 അര്ദ്ധരാത്രി നിയമസഭയുടെ പ്രത്യേക സമ്മേളനം വിളിച്ച് ചേര്ക്കണമെന്ന പ്രതിപക്ഷ ആവശ്യം തള്ളി മുഖ്യമന്ത്രി പിണറായി വിജയന്. മന്ത്രിമാര്ക്ക് ജില്ലകളിലെ സ്വതന്ത്ര ദിന പരിപാടികളില് പങ്കെടുക്കേണ്ട സാഹചര്യം ചൂണ്ടിക്കാട്ടിയാണ് അദ്ദേഹം പ്രത്യേക നിയമസഭാ സമ്മേളനം ചേരാനാകില്ലെന്ന് വ്യക്തമാക്കിയത്.
ആഗസ്റ്റ് 14ന് അര്ധരാത്രിയോ മറ്റേതെങ്കിലും ദിസവമോ പ്രത്യേക സമ്മേളനം ചേരണമെന്നായിരുന്നു വിഡി സതീശന് ആവശ്യപ്പെട്ടത്. എന്നാല് മറ്റേതെങ്കിലും ദിവസം ചേരുമോ എന്നതില് മുഖ്യമന്ത്രി നിലപാട് അറിയിച്ചിട്ടില്ല. സ്വാതന്ത്ര്യ പോരാട്ടത്തിന്റെ ദീപ്ത സ്മരണ പുതുക്കന്നതിനും മതേതര ജനാധിപത്യത്തിന്റെ മൂല്യങ്ങള് ഉള്പ്പെടെയുള്ള ഭരണഘടനാ തത്വങ്ങള് സംരക്ഷിക്കുന്നതിനുമായി ഒന്നിച്ച് പോരാടുമെന്ന പ്രമേയം നിയമസഭ പാസാക്കണമെന്നും പ്രതിപക്ഷ നേതാവ് കത്തില് ആവശ്യപ്പെട്ടിരുന്നു.
1972ല് ആഗസ്റ്റ് 14ന് രാത്രി ഗവര്ണറുടെ സാന്നിധ്യത്തില് കേരള നിയമസഭ ചേര്ന്നിരുന്നു. സ്വാതന്ത്ര്യത്തിന്റെ 40-ാം വാര്ഷികത്തിന്റെ ഭാഗമായി 1987 ആഗസ്റ്റ് 13നും പ്രത്യേക സിറ്റിംഗ് നടത്തിയിരുന്നെന്ന് പ്രതിപക്ഷ നേതാവ് കത്തില് ചൂണ്ടിക്കാട്ടിയിരുന്നു.
ആഗസ്റ്റ് 14ന് സഭ ചേരാന് സാധിക്കില്ലെങ്കില് മറ്റൊരു ദിവസം പ്രത്യേക സമ്മേളനം ചേരണമെന്നും പ്രതിപക്ഷ നേതാവ് അഭ്യര്ത്ഥിച്ചു.
