മുന്നണി മാറ്റത്തിന് തയ്യാറെടുത്ത് കേരളാ കോണ്‍ഗ്രസ് എം. എല്‍.ഡി.എഫിലേക്ക് വന്നാല്‍ 10 നിയമസഭാ സീറ്റുകള്‍ ആവശ്യപ്പെടാനാണ് പാര്‍ട്ടിക്കുള്ളിലെ ധാരണ. പാലാ സീറ്റില്‍ വിട്ടുവീഴ്ച ചെയ്യേണ്ടെന്നാണ് പാര്‍ട്ടി നേതാക്കള്‍ക്കിടയിലെ ധാരണ. ഇതിനുപകരമായി ജോസ് കെ മാണിയുടെ രാജ്യസഭാ അംഗത്വം രാജിവെച്ച് സീറ്റ് എന്‍സിപിക്ക് നല്‍കുന്നതിനും എതിര്‍പ്പില്ല.
നേരത്തെ പാലാ സീറ്റ് മോഹിച്ച് ആരും എല്‍ഡിഎഫിലേക്ക് വരേണ്ടതില്ലെന്ന് മാണി സി കാപ്പന്‍ പറഞ്ഞിരുന്നു. എന്നാല്‍ പാലാ സീറ്റില്‍ വിട്ടുവീഴ്ച വേണ്ടെന്ന ശക്തമായ നിലപാടിലാണ് ജോസ് പക്ഷം. ഇത് എല്‍ഡിഎഫിനുള്ളില്‍ സമ്മര്‍ദം ഉണ്ടാക്കുന്നുണ്ട്. അതേസമയം കോട്ടയത്ത് അഞ്ച് സീറ്റിന് പുറമേ, ഇടുക്കി, തിരുവല്ല, പേരാമ്പ്ര, ഇരിങ്ങാലക്കുട എന്നീ സീറ്റുകളാണ് കേരളാ കോണ്‍ഗ്രസ് എം ആവശ്യപ്പെടുക. തിരുവനന്തപുരം ജില്ലയില്‍ ഒരു സീറ്റും ചോദിക്കും.
