മലപ്പുറം: കൊല്ലത്ത് നിന്ന് ആറുവയസുകാരി അബിഗേല് സാറാ റെജിയെ തട്ടിക്കൊണ്ടുപോയ വ്യജ നമ്പര് വാഹനത്തിന്റെ ഉടമയുടെ ശ്വാസതടസം ഇതേവരെ മാറിയിട്ടില്ല. മലപ്പുറം എടവണ്ണ സ്വദേശി ബിമല് സുരേഷാണ് തട്ടികൊണ്ടുപോകല് സംഘം നല്കിയ എട്ടിന്റെ പണിയില് നട്ടം തിരിഞ്ഞത്.
അബിഗേലിനെ തട്ടിക്കൊണ്ടുപോകാന് ഉപയോഗിച്ച കാറില് അക്രമികള് ഉപയോഗിച്ച വ്യാജ നമ്പര് പ്ലേറ്റില് ഉണ്ടായിരുന്നത് ബിമലിന്റെ വാഹനത്തിന്റെ KL-04-AF-3239 എന്ന നമ്പറാണ്. അതും കുട്ടിയെ തട്ടിക്കൊണ്ടുപോകാന് ഉപയോഗിച്ച അതേ മോഡല് വെള്ള സ്വിഫ്റ്റ് ഡിസയര് കാര് തന്നെയാണ് ബിമലിന്േത്.
ഖത്തറിലെ ഗ്യാസ് പ്ലാന്റില് ഓപ്പറേറ്ററായി ജോലിചെയ്യുന്ന ബിമല് ലീവിന് നാട്ടില് വന്നതാണ്. ബിമലിന്റെ അമ്മ ഡോ. ഗിരിജയാണ് കാര് ഉപയോഗിക്കുന്നത്.
സംഭവ ദിവസം പുലര്ച്ചെ മൂന്നര-നാല് മണിക്ക് പോലീസ് വീട്ടില് വന്ന് ‘നിങ്ങടെ കാര് ജില്ലയ്ക്ക് പുറത്തുവെച്ച് അപകടത്തില് പെട്ടു, അതിന്റെ കാര്യങ്ങള് അന്വേഷിക്കാന് വന്നതാണ്’ എന്ന് പറഞ്ഞു. കുട്ടിയെ തട്ടിക്കൊണ്ടുപോയ കാര്യം അപ്പൊള് പറഞ്ഞില്ല. കാര് വീട്ടില് തന്നെയുണ്ടെന്ന് പറഞ്ഞപ്പൊ അവര് കൂളായിട്ട് തിരിച്ചുപോയി. പിന്നെ വിളിച്ചിട്ടാണ് സംഭവം എന്താണെന്ന് പറയുന്നത്’, ബിമല് സുരേഷ് പറഞ്ഞു.
യാതൊരു തെറ്റും ചെയ്തില്ലെങ്കിലും സ്വന്തം കാര് പുറത്തിറക്കാന് കഴിയാത്ത സ്ഥിതിയിലായിരുന്നു ബിമല്. റോഡില് കാര് കാണുന്ന ആരെങ്കിലും ‘കുഞ്ഞിനെ തട്ടിക്കൊണ്ടുപോയതിന്റെ’ രോഷം തന്റെ കാറിനോടോ തന്നോടോ തീര്ക്കുമോ എന്ന ആശങ്കയായിരുന്നു ബിമലിന്.
‘മഞ്ചേരിയിലെ യൂസ്ഡ് കാര് ഷോറൂമില് നിന്ന് ഏപ്രിലിലാണ് ഈ കാര് വാങ്ങിയത്. ഞാന് ഗള്ഫിലായതിനാല് അമ്മയാണ് കാര് ഉപയോഗിക്കുന്നത്. കൊല്ലത്തെ കുട്ടിയെ തട്ടിക്കൊണ്ടുപോകാന് ഈ കാറിന്റെ നമ്പറാണ് അവര് ഉപയോഗിച്ചത് എന്നതുകൊണ്ടാണ് ബുദ്ധിമുട്ടുണ്ടായത്. എന്തായാലും കുട്ടിയെ തിരിച്ചുകിട്ടിയതില് വലിയ സന്തോഷമുണ്ട്.’
എന്നാല്, കാറുമായി ബന്ധപ്പെട്ട അലയൊലികള് അടങ്ങിയതോടെ കാര് വീണ്ടും നിരത്തിലിറങ്ങിയിരിക്കുകയാണ് ബിമല്. കഴിഞ്ഞ ദിവസം ചാനലില് വാര്ത്ത വന്നതിന് ശേഷമാണ് കാറെടുത്തത്. ഇത്രയും ദിവസം അനുഭവിച്ച മാനസിക സംഘര്ഷത്തില്നിന്ന് മുക്തനായതിന്റെ ആശ്വാസത്തില് കുടുംബവുമായി മഞ്ചേരി ടൗണില് കറങ്ങാന് ഇറങ്ങിയായിരുന്നു. ഉച്ചയ്ക്ക് ശേഷം മഞ്ചേരിയിലൊക്കെ ഒന്ന് കറങ്ങാനാണ് പോയത്. പിന്നെ സിനിമയും കണ്ടു. വഴിയില് ഒരു പ്രശ്നവും ഉണ്ടായില്ലന്നും ബിമല് പറയുന്നു. ലീവ് കഴിഞ്ഞ് അടുത്ത ദിവസം ബിമല് തിരികെ ഖത്തറിലേക്ക് പോകും.