പൊതുമേഖല സ്ഥാപനങ്ങളില് പെന്ഷന് പ്രായം 60 ആക്കി ഏകീകരിച്ചു കൊണ്ട് ധനവകുപ്പ് ഇറക്കിയ ഉത്തരവ് പിന്വലിക്കണമെന്ന് ഡിവൈഎഫ്ഐ. ഒരു ലക്ഷത്തില് കൂടുതല് ജീവനക്കാര്ക്ക് ബാധകമാകുന്ന ഈ ഉത്തരവ് തൊഴിലന്വേഷകരായ ലക്ഷക്കണക്കിന് ഉദ്യോഗാര്ത്ഥികളെ പ്രതികൂലമായി ബാധിക്കുന്നതാണെന്നും ഡിവൈഎഫ്ഐ പറഞ്ഞു. തൊഴിലില്ലായ്മ ഉള്പ്പെടെയുള്ള കാര്യങ്ങള് രൂക്ഷമാകും. സംസ്ഥാനത്തെ തൊഴിലില്ലായ്മ നിരക്ക് ദേശീയ ശരാശരിയേക്കാള് കൂടുതലാണ്. സേവന വേദന വ്യവസ്ഥകള് ഏകീകരിക്കുന്നതില് എതിര്പ്പില്ലെന്നും ഡിവൈഎഫ്ഐ സംസ്ഥാന സെക്രട്ടറി വി കെ സനോജ് പറഞ്ഞു.
122 പൊതുമേഖലാ സ്ഥാപനങ്ങളില് കെഎസ്ഇബി, കെഎസ്ആര്ടിസി, വാട്ടര് അതോറിറ്റി എന്നീ സ്ഥാപനങ്ങളില് ഒഴികെ പുതിയ ഉത്തരവ് ബാധകമാവുകയാണ്. ഒക്ടോബര് 30നാണ് സംസ്ഥാനത്തെ പൊതുമേഖലാ സ്ഥാപനങ്ങളിലെ പെന്ഷന് പ്രായം അറുപതാക്കി ധനവകുപ്പ് ഉത്തരവിറക്കിയത്. നിലവില് പല സ്ഥാപനങ്ങളിലും വ്യത്യസ്ത പെന്ഷന് പ്രായം ആയിരുന്നു.
റിയാബ് ചെയര്മാന് തലവനായ വിദഗ്ധസമിതിയുടെ ശുപാര്ശ അംഗീകരിച്ച് കൊണ്ടാണ് പൊതുമേഖലാ സ്ഥാപനങ്ങളുടെ പെന്ഷന് പ്രായം 60 ആക്കി ഏകീകരിച്ചത്. വിവിധ സ്ഥാപനങ്ങളില് 56, 58, 60 എന്നിങ്ങനെ വ്യത്യസ്തമാണ് പെന്ഷന് പ്രായം. ഒന്നരലക്ഷം പേര്ക്കാണ് ആനുകൂല്യം കിട്ടുക. 29 നാണ് ധനവകുപ്പ് ഉത്തരവിറങ്ങിയത്. ഈ മാസം വിരമിക്കേണ്ടവര്ക്ക് കൂടുതല് സര്വ്വീസ് ലഭിക്കും.
കൂടുതല് തൊഴിലവസരങ്ങള് ഉള്ള കെഎസ്ഇബിയിലെയും, കെഎസ്ആര്ടിസിയിലെയും, വാട്ടര് അതോറിറ്റിയിലെയും പെന്ഷന് പ്രായം കൂട്ടല് പിന്നാലെ വരും. ഈ മൂന്ന് സ്ഥാപനങ്ങളിലെയും സാഹചര്യം പ്രത്യേകം പഠിക്കാനും ഉത്തരവില് നിര്ദ്ദേമുണ്ട്. കെഎസ്ബിയില് യൂണിയനുകളുടെ സമരം തീര്ക്കാന് സര്ക്കാര് വെച്ച ഒരു നിര്ദ്ദേശം പെന്ഷന് പ്രായം കൂട്ടാമെന്നായിരുന്നു.
