ന്യൂഡല്ഹി: രണ്ടാം മോദി സര്ക്കാരിന്റെ അവസാന സമ്പൂര്ണ ബജറ്റ് ധനമന്ത്രി നിര്മ്മലാ സീതാരാമന് ഇന്ന് അവതരിപ്പിക്കും. ഇന്ന് 11 മണിക്ക് ലോക്സഭയില് അവതരിപ്പിക്കുന്ന ബജറ്റില് തെരഞ്ഞെടുപ്പ് മുന്നില് കണ്ട് ജനപ്രിയ പ്രഖ്യാപനങ്ങള് ഉണ്ടാവുമെന്നാണ് പ്രതീക്ഷ. അഞ്ചാം തവണയാണ് നിര്മ്മലാ സീതാരാമന് ബജറ്റ് അവതരിപ്പിക്കുന്നത്.
തെരഞ്ഞെടുപ്പിന് മുന്പുള്ള അവസാന സമ്പൂര്ണ ബജറ്റായതിനാല് നികുതി വര്ധനക്ക് സാധ്യതയില്ല. എന്നാല് സ്വകാര്യവത്കരണത്തിലൂടെ വരുമാനം വര്ധിപ്പിക്കാനുള്ള കൂടുതല് ശ്രമം ഇത്തവണയും ഉണ്ടാകും. ഇതിലൂടെ 75,000-80,000 കോടിയെങ്കിലും സമാഹരിക്കാനാണൂ സര്ക്കാര് ശ്രമം. വിമാനത്താവളങ്ങള് സ്വകാര്യവത്കരിക്കുന്നതില് സര്ക്കാര് കൂടുതല് നടപടി സ്വീകരിച്ചേക്കും.
രാജ്യം നടപ്പ് സാമ്പത്തിക വര്ഷം ഏഴ് ശതമാനം വളര്ച്ച നേടുമെന്നാണ് സാമ്പത്തിക സര്വ്വേ. ഇത് കണക്കിലെടുത്ത് വരുമാനം വര്ദ്ധിപ്പിക്കാനുള്ള ശ്രമങ്ങളും ധനകമ്മി കുറക്കാനുള്ള നീക്കങ്ങളും ബജറ്റില് ഉണ്ടാവുമെന്നാണ് പ്രതീക്ഷ.
രാജ്യത്തെ കോര്പ്പറേറ്റുകള് ഉറ്റുനോക്കുന്നത് ആദായനികുതി സ്ലാബിലെ മാറ്റമാണ്. കഴിഞ്ഞ വര്ഷം ടാക്സ് സ്ലാബില് യാതൊരു മാറ്റവും സംഭവിച്ചിരുന്നില്ല. വിലക്കയറ്റം ജനങ്ങളുടെ സേവിംഗ്സ് പോലും കാര്ന്നുതിന്നുന്ന സ്ഥിതിയായിരുന്നു. ഇടത്തരക്കാരെ ലക്ഷ്യമിട്ട് ആദായ നികുതി നിരക്ക് പരിഷ്കരിക്കാനുള്ള പ്രഖ്യാപനം കേന്ദ്ര ബജറ്റിലുണ്ടായേക്കും. . 80സി, 80ഡി വകുപ്പുകള്ക്ക് കീഴിലെ കിഴിവുകള് വര്ധിപ്പിച്ചേക്കും. തൊഴില് സൃഷ്ടിക്കുന്നതിന് ബജറ്റില് പ്രമുഖ്യം നല്കും. 5 മുതല് 10 ലക്ഷം രൂപവരെയുള്ള വരുമാനം 20 ശതമാനമാണ് നികുതി സ്ലാബിലാണ്. 10-15 ശതമാനത്തിന്റെ പുതിയ സ്ലാബ് പ്രഖ്യാപിച്ചേക്കാം. 10 ലക്ഷത്തിന് മുകളിലുള്ള വരുമാനത്തിന് നികുതി 30 ശതമാനത്തില് നിന്ന് 25 ശതമാനക്കി കുറച്ചേക്കാം. ചില സെസ് നിരക്കും കുറയ്ക്കാന് സാധ്യതയുണ്ട്. 80 സി വകുപ്പ് അനുസരിച്ച് നിക്ഷേപങ്ങള്ക്കും ചെലവുകള്ക്കും ഒന്നര ലക്ഷം രൂപവരെ ഇപ്പോള് പരമാവധി കിഴിവു ലഭിക്കുന്നു. ഇത് 2 ലക്ഷമാക്കി ഉയര്ത്താനിടയുണ്ട്.
അതേസമയം പൊതുതെരഞ്ഞെടുപ്പിന് ഒരു വര്ഷം കൂടി ഉണ്ടെന്നിരിക്കെ ഒരു കേന്ദ്രബജറ്റും കൂടി മുന്നിലുള്ളതിനാല്, സന്തുലിതമായ ഒരു ബജറ്റായിരിക്കും ധനമന്ത്രി പ്രഖ്യാപിക്കുകയെന്ന അഭിപ്രായം ഉയരുന്നുണ്ട്. എന്നാല് തുടര്ഭരണം മുന്നില് കണ്ട് ബിജെപി തുടര്ച്ചയായി കര്ഷകര്ക്കും ഗ്രാമീണ ജനതയ്ക്കും വേണ്ടിയുള്ള വമ്പിച്ച ക്ഷേമ പരിപാടികള് പ്രഖ്യാപിച്ചേക്കുമെന്നതും തള്ളികളയാനാവില്ല.വ്യാപാരം തുടങ്ങാന് ആഗ്രഹിക്കുന്നവര്ക്കും വിതരണക്കാര്ക്കും സാമ്പത്തിക ആനുകൂല്യങ്ങള് പ്രഖ്യാപിച്ച് മോദി സര്ക്കാര് ‘മേക്ക് ഇന് ഇന്ത്യ’, ‘ആത്മനിര്ഭര് ഭാരത്’ നയങ്ങള് ശക്തിപ്പെടുത്തിയേക്കും. ആഗോള വിതരണ ശൃംഖലയില് ചൈനയ്ക്ക് ബദലാണെന്ന് സ്വയം പ്രഖ്യാപിക്കാനാവും ഇന്ത്യ ശ്രമിക്കുക.