ചെന്നൈ: മുതിര്‍ന്ന എഐഎഡിഎംകെ നേതാവ് കെ.എ സെങ്കോട്ടയ്യന്‍, വിജയ് നയിക്കുന്ന തമിഴക വെട്രി കഴകം ( ടിവികെ ) അംഗ്വതമെടുത്തു.
എംജിആര്‍ വിശ്വസ്തനായി അറിയിപ്പെടുന്ന മുന്‍ മന്ത്രിയും മുതിര്‍ന്ന രാഷ്ട്രീയക്കാരനുമായ സെങ്കോട്ടയ്യന്‍ പനയൂരിലെ ടിവികെ ആസ്ഥാനത്ത് എത്തിയാണ് പാര്‍ട്ടി അംഗത്വം സ്വീകരിച്ചത്. ടിവികെ രൂപീകരിച്ച ശേഷം പാര്‍ട്ടിയിലേക്ക് എത്തുന്ന ആദ്യ പ്രമുഖ നേതാവാണ് സെങ്കോട്ടയ്യന്‍.മുൻ എംപി വി. സത്യഭാമയും സെങ്കോട്ടയ്യനൊപ്പം ടിവികെയിൽ ചേർന്നു.
ഒൻപതുതവണ എംഎൽഎ ആയിട്ടുള്ള സെങ്കോട്ടയ്യൻ ജയലളിതയും ഇപിഎസ് സർക്കാരുകളിലും മന്ത്രി ആയിരുന്നു.സങ്കോട്ടയ്യന്റെ അനുഭവസമ്പത്ത് ടിവികെയ്ക്ക് കരുത്താകുമെന്ന് വിജയ് വീഡിയോ സന്ദേശത്തിൽ പറഞ്ഞു. തമിഴ്നാട്ടിൽ വലിയ മാറ്റങ്ങൾ കൊണ്ടുവരാൻ ടിവികെയ്ക്ക് കഴിയുമെന്നാണ് സെങ്കോട്ടയ്യൻ അഭിപ്രായപ്പെട്ടത്.
എഐഎഡിഎംകെയിലെ അഭ്യന്തര സംഘർഷങ്ങൾക്ക് പിന്നാലെയാണ് സെങ്കോട്ടയ്യൻ പാർട്ടിയിൽ നിന്ന് പുറത്താകുന്നത്. കഴിഞ്ഞ ദിവസം ഗോപിചെട്ടിപാളയത്ത് നിന്നുള്ള ജനപ്രതിനിധിയായ സെങ്കോട്ടയ്യൻ എംഎൽഎ സ്ഥാനം രാജിവെച്ചിരുന്നു. സ്പീക്കർ എം അപ്പാവുവിനെ നേരിൽ കണ്ടായിരുന്നു സെങ്കോട്ടയ്യൻ്റെ രാജി സമർപ്പിച്ചത്.
