തിരുവനന്തപുരം: ജില്ലയുടെ തെക്കുകിഴക്കന് മേഖലകളിലും കനത്തമഴ വന്നാശം വിതച്ചു. വെമ്പായത്തും പാറശ്ശാലയിലും മണ്ണിടിഞ്ഞുവീണ് മൂന്ന് വീടുകള് തകര്ന്നു. നെയ്യാറും കൈത്തോടുകളും കരകവിഞ്ഞതോടെ ഇരുനൂറിലേറെ ഏക്കര് കൃഷിയിടം വെള്ളത്തിലായി .നെയ്യാറ്റിന്കരയില് ആല്മരം കടപുഴകി വീണ് ദേശീയപാതയില് ഗതാഗതം മുടങ്ങി.
നെയ്യാര് കരകവിഞ്ഞതോടെ തെക്കന് മേഖലയില് വന്നാശം. അമരവിള കണ്ണംകുഴി പാടശേഖരം വെള്ളത്തിനടിയില്ലായി .ഇരുനൂറിലേറെ ഏക്കര് കൃഷിയിടത്തില് വെള്ളം കയറി.കൈത്തോടുകള് നിറഞ്ഞുകവിഞ്ഞു. നെയ്യാറ്റിന്കര റയില്വെ സ്റ്റേഷനുസമീപവും വീടുകളില് വെള്ളംകയറി. നാട്ടുകാരും ഫയര്ഫോഴ്സും ചേര്ന്ന് വെള്ളംകയറാന് സാധ്യതയുള്ള വീടുകളിലെ ആള്ക്കാരെ മാറ്റുന്നു.നെയ്യാര് സബ്കനാല് ബണ്ട് തകര്ന്ന് കൃഷിയിടങ്ങളിലും വീടുകളിലും വെള്ളംകയറി.പാറശ്ശാലയില് ബണ്ട് തകര്ന്ന് വെള്ളം കുത്തിയൊലിച്ച് ലൈഫ് പദ്ധതിയില് പണിത വീട് നിലംപൊത്തി.പരശുവയ്ക്കല് മലഞ്ചുറ്റ് സ്വദേശിനി സന്ധ്യയുടെ വീടാണ് തകര്ന്നത്.