കണ്ടയ്‌മെന്റ് സോണായ തിരുവനന്തപുരം അഞ്ചുതെങ്ങില്‍ നാട്ടുകാരും പൊലീസും തമ്മില്‍ ഏറ്റുമുട്ടി. കൊവിഡിനെ തുടര്‍ന്ന് കണ്ടെയ്ന്‍മെന്റ് സോണുകളില്‍ വിലക്ക് നീട്ടിയതിനെ തുടര്‍ന്ന് ഇവിടെയുള്ള മത്സ്യ തൊഴിലാളികള്‍ക്ക് മീന്‍പിടിക്കാന്‍ പോകാനായില്ല. എന്നാല്‍ ഇന്ന് വിലക്ക് ലംഘിച്ച് മീന്‍പിടിക്കാന്‍ ഇവര്‍ പോയി. ഇത് പൊലീസ് തടഞ്ഞതോടെയാണ് സംഘര്‍ഷം ഉണ്ടായത്. മീന്‍ ലേലം നടത്താനുള്ള ശ്രമവും പൊലീസ് തടഞ്ഞിരുന്നു. സംഘടിച്ചെത്തിയ നാട്ടുകാര്‍ പഞ്ചായത്ത് ഓഫീസില്‍ എത്തി പ്രതിഷേധിച്ചു. ഇവിടെ ജീവനക്കാരെ തടഞ്ഞുവെച്ചു. പിന്നീട് പൊലീസെത്തി പ്രതിഷേധിച്ചവരെ പിരിച്ചുവിട്ടു. മീന്‍പിടിക്കാനുള്ള വിലക്ക് ലംഘിച്ചതിനും കൊവിഡ് പ്രോട്ടോക്കോള്‍ ലംഘിച്ച് കൂട്ടം ചേര്‍ന്നതിനും പ്രതിഷേധക്കാര്‍ക്കെതിരെ പൊലീസ് കേസെടുത്തു.
