തിരുവനന്തപുരം:കേരളീയം 2023ന് ഇന്ന് തലസ്ഥാനത്ത് തിരിതെളിയും അറുപത്തിയേഴാം പിറന്നാള് നിറവില് ഐക്യകേരളം. തിരുവിതാംകൂര്, കൊച്ചി, മലബാര് എന്നിങ്ങനെ മൂന്നായി നിലകൊണ്ട ഭൂപ്രദേശങ്ങളെ ഒത്തു ചേര്ത്ത് മലയാളം ഭാഷ സംസാരിക്കുന്നവര് എന്ന നിലയില് ഐക്യ കേരളമായി മാറ്റുകയായിരുന്നു. വൈവിധ്യങ്ങളുടെ നാട് ഭാഷയുടെ അടിസ്ഥാനത്തില് ഒന്നായതിന്റെ ഓര്മ ദിനമാണ് കേരളപ്പിറവിയായി ആഘോഷിക്കുന്നത്.
കേരളപ്പിറവി ആഘോഷത്തിന്റെ ഭാഗമായി ഒരാഴ്ച നീളുന്ന കേരളീയം 2023ന് ഇന്ന് തലസ്ഥാനത്ത് തിരിതെളിയും. രാവിലെ 10 മണിക്ക് തിരുവനന്തപുരം സെന്ട്രല് സ്റ്റേഡിയത്തില് കമലഹാസനും മമ്മൂട്ടിയും മോഹന്ലാലും ശോഭനയും മഞ്ജു വാര്യരും അടങ്ങുന്ന വന് താരനിരയുടെ സാന്നിധ്യത്തിലാണ് ഉദ്ഘാടന ചടങ്ങ്. വ്യവസായപ്രമുഖരായ എം.എ. യൂസഫലി, രവി പിള്ള, ആരോഗ്യമേഖലയിലെ പ്രമുഖ വ്യക്തിത്വമായ ഡോ. എം.വി.പിള്ള എന്നിവരും ചടങ്ങിനെത്തും. ഉദ്ഘാടന ചടങ്ങില് യു.എ.ഇ, ദക്ഷിണ കൊറിയ, നോര്വേ, ക്യൂബ തുടങ്ങിയ രാജ്യങ്ങളിലെ നയതന്ത്ര പ്രതിനിധികളും സാന്നിധ്യമറിയിക്കും. അതേസമയം സാമ്പത്തിക പ്രതിസന്ധിക്കിടെ കേരളീയം പരിപാടി ധൂര്ത്താണെന്ന് ആരോപിച്ച് പ്രതിപക്ഷം ചടങ്ങില് നിന്ന് വിട്ടുനില്ക്കുകയാണ്.
കവടിയാര് മുതല് കിഴക്കേ കോട്ട വരെ 42 വേദികളിലായാണ് കേരളീയം അരങ്ങേറുന്നത്. എല്ലാ ദിവസവും വൈകുന്നേരം ആറു മുതല് കലാപരിപാടികള് അരങ്ങേറും. എക്സിബിഷന്, ട്രേഡ് ഫെയര്, ഭക്ഷ്യമേളകള് തുടങ്ങി മറ്റെല്ലാ പരിപാടികളും രാവിലെ 10 മണി മുതല് രാത്രി 10 മണി വരെ ഉണ്ടാകും. ചുമര് ചിത്രങ്ങളും ഇന്സ്റ്റലേഷനുകളും ഉള്ക്കൊള്ളുന്ന പ്രദര്ശനങ്ങളും കേരളീയത്തിന് മാറ്റുകൂട്ടും. വ്യത്യസ്ത രുചികളുമായി ഫുഡ് ഫെസ്റ്റിവലുമുണ്ട്. 11 വേദികളിലായി സംഘടിപ്പിക്കുന്ന വ്യത്യസ്ത രുചിക്കൂട്ടുകള് അവതരിപ്പിക്കുന്ന ഭക്ഷ്യമേള പ്രധാന ആകര്ഷണമാണ്. പ്രമുഖരെത്തുന്ന കലാപരിപാടികളും കേരളീയത്തിന്റെ ഭാഗമായി നടക്കും
നവകേരളത്തിന്റെ ഭാവി രൂപരേഖ തയാറാക്കുക എന്ന ലക്ഷ്യത്തോടെയുള്ള 25 സെമിനാറുകളാണ് 5 വേദികളിലായി നടക്കുന്നത്. കേരളീയം ആഘോഷത്തിന്റെ ഭാഗമായി ദീപാലങ്കാരങ്ങളാല് നിറഞ്ഞിരിക്കുകയാണ് തലസ്ഥാനനഗരി. സെന്ട്രല് സ്റ്റേഡിയം, കനകക്കുന്ന്, മാനവീയം വീഥി, പുത്തരിക്കണ്ടം, ടാഗോര് തിയേറ്റര്, യൂണിവേഴ്സിറ്റി കോളേജ് എന്നിങ്ങനെ 42 വേദികളാണ് കേരളീയത്തിനായി ഒരുങ്ങിയിരിക്കുന്നത്. എല്ലാ വേദികളിലേക്കും സൗജന്യ ഇലക്ട്രിക്ക് ബസ് സര്വീസുകളുണ്ടാകും. കേരളീയത്തിനൊപ്പം നിയമസഭാമന്ദിരത്തില് പുസ്തകോത്സവം നടക്കും.
മുഖ്യമന്ത്രിയുടെ ഫേസ്ബുക്ക് പോസ്റ്റ്….
കേരളീയം 2023 ന്റെ ഉദ്ഘാടനം നവംബര് ഒന്നിന് രാവിലെ 10 മണിക്ക് തിരുവനന്തപുരം സെന്ട്രല് സ്റ്റേഡിയത്തില് നടക്കും. ഉദ്ഘാടന ചടങ്ങില് യു.എ.ഇ, ദക്ഷിണ കൊറിയ, നോര്വേ, ക്യൂബ തുടങ്ങിയ രാജ്യങ്ങളിലെ നയതന്ത്ര പ്രതിനിധികള്, ചലച്ചിത്ര താരങ്ങളായ കമലഹാസന്, മമ്മൂട്ടി, മോഹന്ലാല്, ശോഭന, മഞ്ജു വാര്യര്, വ്യവസായപ്രമുഖരായ എം.എ. യൂസഫലി, രവി പിള്ള, ആരോഗ്യമേഖലയിലെ പ്രമുഖ വ്യക്തിത്വമായ ഡോ. എം.വി.പിള്ള എന്നിവരുള്പ്പെടെ വലിയൊരു നിര പങ്കെടുക്കും.
