ഇടുക്കി: സര്‍ക്കാര്‍ ഭൂമിയിലെ തേക്ക് വെട്ടിക്കടത്തിയതിന് സസ്പെന്‍ഷനിലായിരുന്ന റേഞ്ച് ഓഫീസറെ തിരിച്ചെടുത്തു. അടിമാലി മുന്‍ റേഞ്ച് ഓഫീസര്‍ ജോജി ജോണിന്റെ സസ്പെന്‍ഷനാണ് പിന്‍വലിച്ചത്. പുനലൂര്‍ ഡിവിഷനിലെ വര്‍ക്കിംഗ് പ്ലാന്‍ റേഞ്ചിലാണ് പുതിയ നിയമനം.
വെട്ടിക്കടത്തിയ മരത്തടികള്‍ ജോജി ജോണിന്റെ മാതാവിന്റെ ഉടമസ്ഥതയിലുള്ള കെട്ടിടത്തില്‍ നിന്നും കണ്ടെടുത്തിരുന്നു. അടിമാലി മരംവെട്ട് കേസിലും പ്രതിയാണ് ഇയാള്‍. മങ്കുവയില്‍ സര്‍ക്കാര്‍ ഭൂമിയില്‍ നിന്നും ഏഴ് തോക്കുമരങ്ങള്‍ വെട്ടിക്കടത്തിയെന്നാണ് ഇയാള്‍ക്കെതിരെ രജിസ്റ്റര്‍ ചെയ്ത കേസ്. 100 വര്‍ഷത്തോളം പഴക്കമുള്ള തേക്കുമരം മുറിച്ചുവെന്നാണ് കണ്ടെത്തല്‍.
അടിമാലി റേഞ്ച് ഓഫീസറായിരിക്കെ വ്യാപകമായി ക്രമവിരുദ്ധമായി മരംമുറിക്ക് അനുമതി നല്‍കിയെന്നാണ് അടിമാലി പൊലീസിന്റെ കേസ്.കേസില്‍ മുന്‍കൂര്‍ജാമ്യാപേക്ഷ തള്ളിയതിന് പിന്നാലെ കോടതിയുടെ നിര്‍ദേശ പ്രകാരം വനംവകുപ്പ് ഇയാളെ സസ്പെന്‍ഡ് ചെയ്യുകയായിരുന്നു. കേസില്‍ വിജിലന്‍സ് അന്വേഷണം പുരോഗമിക്കവെയാണ് സര്‍വ്വീസില്‍ തിരിച്ചെടുത്തത്.
