പൊതുഇടങ്ങളില്‍ അപകടകരമായി നില്‍ക്കുന്ന മരങ്ങള്‍ വെട്ടിമാറ്റി പൊതുഇടങ്ങള്‍ സുരക്ഷി തമാക്കാന്‍ ഇടുക്കി ജില്ലാ ദുരന്തനിവാരണ അതോറിറ്റി യോഗം നിര്‍വ്വഹണോദ്യോഗസ്ഥരെ ചുമതലപ്പെടുത്തി. ജില്ലാ ദുരന്തനിവാരണ അതോറിറ്റി അദ്ധ്യക്ഷന്‍ ജില്ലാ കളക്ടര്‍ എച്ച് ദിനേശന്റെ അധ്യക്ഷതയിലാണ് യോഗം ചേര്‍ന്നത്.
പുഴകളിലെയും തോടുകളിലെയും അവശിഷ്ടങ്ങള്‍ നീക്കം ചെയ്ത് വെള്ളമൊഴുക്ക് സുഗമ മാക്കുന്ന പ്രവര്‍ത്തനങ്ങള്‍ രണ്ടാഴ്ചയ്ക്കുള്ളില്‍ പൂര്‍ത്തീകരിക്കാന്‍ പഞ്ചായത്ത് ഡെപ്യൂട്ടി ഡയറക്ടറോട് കളക്ടര്‍ ആവശ്യപ്പെട്ടു. റോഡു വശങ്ങളിലെ അപകടകരമാം വിധമുള്ള മരങ്ങള്‍ വെട്ടാന്‍ യോഗം കെ.എസ്.ഇ.ബിയോട് ആവശ്യപ്പെട്ടു. ദുരന്തപ്രതിരോധ രക്ഷാപ്രവര്‍ത്തന ഉപകരണങ്ങള്‍ അടിയന്തരമായി അറ്റകുറ്റപണി തീര്‍ത്ത് പ്രവര്‍ത്തന സജ്ജമാണെന്ന് വകുപ്പ് മേധാവികള്‍ ഉറപ്പു വരുത്തണം.
ദുരിതാശ്വാസ ക്യാമ്പുകള്‍ തുറക്കേണ്ട സാഹചര്യമുണ്ടായാല്‍ ആളുകളെ പാര്‍പ്പിക്കാനുള്ള സൗകര്യങ്ങള്‍ പഞ്ചായത്ത് തലത്തില്‍ കണ്ടെത്തണം. സന്നദ്ധ പ്രവര്‍ത്തകര്‍ക്ക് അഗ്നി ശമന സേനയുടെ നേതൃത്വത്തില്‍ താലൂക്ക് തലത്തില്‍ ദുരന്ത പ്രതിരോധത്തിലും രക്ഷാ പ്രവര്‍ത്ത നത്തിലും പരിശീലനം നല്കും. ഉപയോഗശൂന്യമായ ക്വാറികള്‍, പടുതാക്കുളങ്ങള്‍ എന്നിവയ്ക്ക് ചുറ്റും സുരക്ഷവേലി ഉറപ്പു വരുത്തണമെന്നും ജില്ലാ കലക്ടര്‍ നിര്‍ദ്ദേശിച്ചു.
