മരട് : വിദ്യാഭ്യാസ രംഗത്ത് തൊഴിലധിഷ്ഠിത കോഴ്സുകള്ക്ക് പ്രാധാന്യം നല്കുന്ന പഠന രീതികള് ആരംഭിക്കുമെന്ന്
പൊതുവിദ്യാഭ്യാസ തൊഴില് വകുപ്പ് മന്ത്രി വി. ശിവന്കുട്ടി പറഞ്ഞു. വ്യാവസായിക പരിശീലന വകുപ്പിന് കീഴിലുള്ള മരട് ഗവ. ഐ.ടി.ഐ യില് നിര്മ്മിച്ച പുതിയ കെട്ടിടത്തിന്റെ ഉദ്ഘാടനം നിര്വഹിച്ച് സംസാരിക്കുകയായിരുന്നു അദ്ദേഹം.
സംസ്ഥാനത്തെ ഐ ടി ഐകളെ കാലാനുസൃതമായി വികസിപ്പിക്കുന്നതിനും പരിഷ്ക്കരിക്കുന്നതിനുമുള്ള നിരവധി പദ്ധതികള് സര്ക്കാര് പരിഗണനയിലുണ്ട്. യുവതലമുറയെ വാര്ത്തെടുക്കുന്നതില് ഇത്തരം സ്ഥാപനങ്ങള് മുഖ്യപങ്ക് വഹിക്കുന്നു. യുവജനങ്ങള്ക്ക് നൈപുണ്യ പരിശീലനം നല്കുന്നതിലൂടെ കൂടുതല് തൊഴിലാളികളെ വാര്ത്തെടുക്കാനാകുമെന്നും സംസ്ഥാനത്തിന്റെ വളര്ച്ചയ്ക്ക് അവരുടെ പങ്കാളിത്തം ഉറപ്പാക്കാനാകുമെന്നും മന്ത്രി പറഞ്ഞു.
വാടക കെട്ടിടത്തില് പ്രവര്ത്തിച്ചിരുന്ന ഐ.ടി.ഐക്ക് 2019 സംസ്ഥാന സര്ക്കാര് അനുവദിച്ച 9.39 കോടി രൂപ വിനിയോഗിച്ചാണ് പുതിയ കെട്ടിട നിര്മ്മിച്ചത്. രണ്ട് നിലകളിലായി നിര്മ്മിച്ച പുതിയ കെട്ടിടത്തില് ഗ്രൗണ്ട് ഫ്ലോറില് രണ്ട് ക്ലാസ് മുറികള്, ഇലക്ട്രോണിക്സ്/മെക്കാനിക്കല് വര്ക്ക് ഷോപ്പ്, വെല്ഡര് വര്ക്ക് ഷോപ്പ്, സ്റ്റോര് റൂം, ഇലക്ട്രിക് റൂം, ശുചിമുറി എന്നിവയും രണ്ടാം നിലയില് ഇലക്ട്രിഷ്യന് വര്ക്ക് ഷോപ്പ്, ഐ.ടി. ലാബ്, ക്ലാസ് മുറി, ഓഫീസ് – സ്റ്റാഫ് മുറി എന്നിവയുമാണുള്ളത്.
ചടങ്ങില് കെ. ബാബു എംഎല്എ അധ്യക്ഷത വഹിച്ചു. പൊതുമരാമത്ത് വകുപ്പ് അസി. എക്സിക്യൂട്ടീവ് എഞ്ചിനീയര് കെ.ആര്. ബിനു റിപ്പോര്ട്ട് അവതരിപ്പിച്ചു. മരട് നഗരസഭ ചെയര്മാന് ആന്റണി ആശാന്പറമ്പില്, വിദ്യാഭ്യാസ സ്റ്റാന്ഡിങ് കമ്മിറ്റി ചെയര്മാന് ബിനോയ് ജോസഫ്, ക്ഷേമകാര്യ സ്റ്റാന്ഡിങ് കമ്മിറ്റി ചെയര്മാന് ബേബി പോള്, എംപ്ലോയ്മെന്റ്& ട്രെയിനിങ് ഡയറക്ടര് ഡോ. വീണാ എന് മാധവന്, വ്യാവസായിക പരിശീലന വകുപ്പ് അഡിഷണല് ഡയറക്ടര് കെ. പി ശിവശങ്കര്, നോഡല് ഐടിഐ പ്രിന്സിപ്പാള് ഗവ. ഐ.ടി.ഐ കളമശ്ശേരി പി.കെ രഘുനാഥന്, മരട് ഐടിഐ പ്രിന്സിപ്പാള് കെ.സി അനിത തുടങ്ങിയവര് പങ്കെടുത്തു.