കൊച്ചി: മാരക മയക്കുമരുന്നുകളുമായി യുവാവ് പിടിയിലായി. ആഢംബര കാറില്‍ ബംഗളൂരുവില്‍ നിന്നും ലഹരി മരുന്ന് കൊച്ചിയിലെത്തിച്ച് വില്‍പ്പന നടത്തി വരികയായിരുന്ന പച്ചാളം പുത്തന്‍തറ ഹൗസില്‍ റോഷെല്‍ വിവേര(38)യാണ് ചാത്ത്യാത്ത് ഭാഗത്ത് നിന്ന് പിടിയിലായത്. ഇയാളില്‍ നിന്ന് വീര്യം കൂടിയ മയക്കു മരുന്ന് വിഭാഗത്തില്‍പ്പെട്ട 5.89 ഗ്രാം കൊക്കയിന്‍, 5.71 ഗ്രാം എംഡിഎംഎ, 1.52 ഗ്രാം കഞ്ചാവ് ഓയില്‍ എന്നിവ പിടിച്ചെടുത്തു.
പ്രതിയുടെ ലഹരിമരുന്ന് വില്‍പ്പനയെക്കുറിച്ച് കൊച്ചി സിറ്റി പൊലീസ് കമ്മീഷണര്‍ എ അക്ബറിന് രഹസ്യ വിവരം ലഭിച്ചിരുന്നു. ഇതിന്റെ അടിസ്ഥാനത്തില്‍ ഡെപ്യൂട്ടി പൊലീസ് കമ്മീഷണര്‍ എസ് ശശിധരന്റെ നിര്‍ദ്ദേശ പ്രകാരം എറണാകുളം നോര്‍ത്ത് പൊലീസും കൊച്ചി സിറ്റി യോദ്ധാവ് സ്‌ക്വാഡും സംയുക്തമായി നടത്തിയ പരിശോധനയിലാണ് പ്രതി പിടിയിലായത്. അന്വേഷണ സംഘത്തില്‍ സബ് ഇന്‍സ്‌പെക്ടര്‍ രതീഷ്, സി പി ഒ രാജേഷ്, സുനില്‍, സി പി ഒ ലിബിന്‍രാജ് എന്നിവരും ഉണ്ടായിരുന്നു.
