അനധികൃത റിക്രൂട്ടിംഗ് ഏജന്‍സികള്‍, വ്യാജ വിസ നല്‍കി ജനങ്ങളെ കബളിപ്പിക്കുന്നവര്‍ എന്നിവര്‍ക്കെതിരെ കര്‍ശന നടപടികളുമായി റൂറല്‍ ജില്ലാ പോലീസ്. ഇത്തരത്തിലുള്ള സംഭവങ്ങള്‍ കൂടുതലായി റിപ്പോര്‍ട്ട് ചെയ്യുന്ന പശ്ചാത്തലത്തില്‍ ഇങ്ങനെയുള്ള ഏജന്‍സികളെകുറിച്ചും വ്യക്തികളെ കുറിച്ചുമുള്ള വിവരങ്ങള്‍ പോലീസ് ശേഖരിച്ചു വരികയാണെന്ന് ജില്ലാ പോലീസ് മേധാവി വിവേക് കുമാര്‍ പറഞ്ഞു.
പ്രായകൂടുതല്‍ ഉള്ളവര്‍ക്കും, ഐ.ഇ.എല്‍.റ്റി.എസ് ഇല്ലാത്തവര്‍ക്കും ക്യാനഡയില്‍ കാര്‍ഷിക മേഖലയിലും, ഹോട്ടല്‍ രംഗത്തും ജോലി വാഗ്ദാനം ചെയ്ത് പണം വാങ്ങി കബളിപ്പിച്ചെന്ന പരാതിയില്‍ മൂവാറ്റുപുഴ കെ.എസ്.ആര്‍.റ്റി.സിയ്ക്ക് സമീപം പ്രവര്‍ത്തിക്കുന്ന പെന്റാ ഓവര്‍സീസ് റിക്രൂട്ട്‌മെന്റ് എന്ന സ്ഥാപനത്തിനെതിരെ മൂവാറ്റുപുഴ പോലീസ് കേസ് രജിസ്റ്റര്‍ ചെയ്തിട്ടുണ്ട്.
ഇരുപത്തി നാലോളം ഉദ്യോഗാര്‍ത്ഥികളില്‍ നിന്നായി ഏകദേശം 45 ലക്ഷം രൂപ കബളിപ്പിച്ചെടുത്തെന്നാണ് പരാതി. സമാനമായ രീതിയില്‍ ക്യാനഡയില്‍ ജോലി വാഗ്ദാനം ചെയ്ത് ഉദ്യോഗാര്‍ത്ഥിയില്‍ നിന്ന് അഞ്ച് ലക്ഷം രൂപ തട്ടിയെടുത്തതായി പരാതി ലഭിച്ചതിനെ തുടര്‍ന്ന് വരാപ്പുഴയിലും കേസ് രജിസ്റ്റര്‍ ചെയ്തിട്ടുണ്ട്.
യുറോപ്യന്‍ രാജ്യങ്ങളിലും മറ്റും ജോലി വാഗ്ദാനം കൂടാതെ വിദേശ വിദ്യാഭ്യാസ സ്ഥാപനങ്ങളില്‍ വിവിധ കോഴ്‌സുകളില്‍ അഡ്മിഷന്‍ വാങ്ങി തരാമെന്ന് വിശ്വസിപ്പിച്ച് പണം കൈക്കലാക്കി കബളിപ്പിക്കുന്നവരുമുണ്ട്. ഇവര്‍ക്കെതിരെ അന്വേഷണം നടന്നു വരികയാണ്.
