കേരള ബാങ്കിന്റെ വടകര എടോടി ശാഖയുടെ ഒന്നാം നിലയില് നിന്നു തലകറങ്ങി താഴേക്കു വീണ ഊരാളുങ്കല് ലേബര് കോണ്ട്രാക്റ്റ് കോപ്പറേറ്റീവ് സൊസറ്റി തൊഴിലാളിയെ സമയോചിതമായ ഇടപെടലിലൂടെ മിന്നല് വേഗത്തില് പിടികൂടി അത്ഭുതകരമായി രക്ഷപ്പെടുത്തിയ യുവാവിന് സൊസൈറ്റിയില് ജോലി നല്കുമെന്ന് സൊസൈറ്റി ചെയര്മാന് രമേശന് പാലേരി. ചെങ്കല് തൊഴിലാളിയായ വടകര കീഴല് സ്വദേശി ബാബുരാജിനാണു ജോലി ലഭിക്കുക.
ബാബുരാജിനെ ആദരിക്കാന് സംഘടിപ്പിച്ച ചടങ്ങിലാണ് സൊസൈറ്റി ചെയര്മാന് രമേശന് പാലേരി ഇക്കാര്യം പ്രഖ്യാപിച്ചത്. ഊരാളുങ്കല് സൊസൈറ്റിയാസ്ഥാനത്തു നടന്ന ചടങ്ങില് ബാബുരാജിന് ചെയര്മാന് ഉപഹാരവും നല്കി. ഈ മാസം 18-നാണ് സംഭവം നടന്നത്. ഒന്നാം നിലയുടെ വരാന്തയുടെ കൈവരിയില് ചാരി നില്ക്കുകയായിരുന്ന അരൂര് സ്വദേശി നടുപ്പറമ്പില് ബിനു പൊടുന്നനെ പിന്നോട്ടു മറിയുകയായിരുന്നു. അടുത്തു നില്ക്കുകയായിരുന്ന ബാബുരാജ് മിന്നല് വേഗത്തില് ബിനുവിന്റെ കാലില് മുറുകെ പിടിക്കുകയായിരുന്നു.
ഒരു കാലിലാണു പിടി കിട്ടിയത്. അതു വിടാതെ അടുത്ത കാലില്ക്കൂടി പിടിച്ചു. അവിടെയുണ്ടായിരുന്ന മറ്റ് ആളുകളും ബാങ്കിലെ ഗണ് മാന് വിനോദും സഹായത്തിനെത്തി. എല്ലാവരും കൂടി ബിനുവിനെ വലിച്ചുകയറ്റി വരാന്തയില് കിടത്തി. ആശുപത്രിയില് എത്തിച്ച് അടിയന്തര വൈദ്യശുശ്രൂഷയും ലഭ്യമാക്കി. സി.സി.റ്റി.വി.യില് പതിഞ്ഞ ഈ ദൃശ്യങ്ങള് അതിവേഗം വൈറല് ആകുകയായിരുന്നു.
