നാമനിര്ദ്ദേശ പത്രികകളുടെ സൂഷ്മ പരിശോധനയില് മൂന്നിടത്ത് എന്ഡിഎ സ്ഥാനാര്ഥികളുടെ പത്രികകള് തള്ളി. തലശ്ശേരിയില് എന്. ഹരിദാസിന്റെയും ദേവികുളത്ത് ആര്. എം ധനലക്ഷ്മിയുടെയും ഗുരുവായൂരില് സി. നിവേദിതയുടെയും പത്രികകളാണ് തള്ളിയത്.
സംസ്ഥാന അധ്യക്ഷന്റെ ഒപ്പില്ലാത്ത കാരണത്താലാണ് തലശ്ശേരിയിലും ഗുരുവായൂരിലും പത്രികകള് തള്ളിയത്. ബിജെപി കണ്ണൂര് ജില്ലാപ്രസിഡന്റായ തലശ്ശേരിയിലെ സ്ഥാനാര്ഥി എന്. ഹരിദാസിന്റെ പത്രികയില് ബിജെപി ദേശീയ അധ്യക്ഷന്റെ ഒപ്പുണ്ടായിരുന്നില്ല. മഹിളാ മോര്ച്ച അധ്യക്ഷയായ ഗുരുവായൂര് സ്ഥാനാര്ഥി സി. നിവേദിതയുടെ പത്രികയില് സംസ്ഥാന അധ്യക്ഷനും ഒപ്പുവെച്ചില്ല. ദേവികുളത്തെ എന്ഡിഎ ഡമ്മി സ്ഥാനാര്ഥിയുടെ പത്രികയും തള്ളി. തലശ്ശേരിയിലും ഗുരുവായൂരിലും എന്ഡിഎക്ക് ഡമ്മി സ്ഥാനാര്ഥികളില്ല.
പത്രിക തള്ളിയതിനെതിരെ നിയമ നടപടി സ്വീകരിക്കുമെന്ന് സ്ഥാനാര്ഥികള് അറിയിച്ചു. തലശ്ശേരിയില് ബിജെപി കണ്ണൂര് ജില്ലാ പ്രസിഡന്റും ഗുരുവായൂരില് മഹിളാ മോര്ച്ച അധ്യക്ഷയുമായിരുന്നു ബിജെപി സ്ഥാനാര്ഥികള്.
ദേവികുളം മണ്ഡലത്തില് എന്.ഡി.എ സ്ഥാനാര്ഥിയുടെ ഉള്പ്പടെ മൂന്ന് പേരുടെ പത്രികകള് തള്ളിയിട്ടുണ്ട്. എന്.ഡി.എ സ്ഥാനാര്ഥി എ.ഐ.എ.ഡി.എം.കെയുടെ ആര്.എം ധനലക്ഷ്മി, എന്.ഡി.എയുടെ ഡമ്മി സ്ഥാനാര്ഥി പൊന്പാണ്ടി, ബി.എസ്.പിയില് മത്സരിക്കുന്ന തങ്കച്ചന് എന്നിവരുടെ പത്രികകളാണ് വരണാധികാരി തള്ളിയത്. സ്ഥാനാര്ഥിയുടെ വ്യക്തി വിവരങ്ങള് നല്കുന്ന ഫോം 26 അപൂര്ണമാണെന്ന് ചൂണ്ടിക്കാട്ടിയാണ് ധനലക്ഷ്മിയുടെ പത്രിക തള്ളിയത്.
2016ല് അണ്ണാ ഡിഎംകെയ്ക്കു വേണ്ടി മത്സരിച്ചു ബിജെപിയെ പിന്തള്ളി മൂന്നാം സ്ഥാനത്ത് എത്തിയ സ്ഥാനാര്ഥിയാണ് ഇത്തവണ എന്.ഡി.എ സ്ഥാനാര്ഥിയായി പത്രിക നല്കിയ ധനലക്ഷ്മി. യു.ഡി.എഫ് സ്ഥാനാര്ഥിയായി ഡി.കുമാറും എല്.ഡി.എഫ് സ്ഥാനാര്ഥിയായി എ.രാജയുമാണു നിയമസഭയിലേക്കു കന്നി അങ്കത്തിനിറങ്ങുന്നത്.
തലശ്ശേരി മണ്ഡലം ബി.ജെ.പി സ്ഥാനാര്ഥി എന് ഹരിദാസിന്റെ പത്രികയും വരണാധികാരി തള്ളി. ബിജെപി ജില്ലാ അധ്യക്ഷന് കൂടിയാണ് ഹരിദാസ്. പത്രികകള് പിന്വലിക്കാനുള്ള അവസാന തീയതി മാര്ച്ച് 22നാണ്. സംസ്ഥാനത്ത് ഇതുവരെ 2138 നാമനിര്ദ്ദേശ പത്രികകളാണ് ലഭിച്ചത്.
