കൊച്ചി: ലോക്സഭ തെരഞ്ഞെടുപ്പ് ദിവസം പി രാജീവും ഹൈബിയും നല്ല സ്ഥാനാര്ത്ഥികളെന്ന് പറഞ്ഞതിന് മമ്മൂട്ടിയെ വിമര്ശിക്കുന്ന അല്ഫോന്സ് കണ്ണന്താനത്തിനെതിരെ സിന്ധു ജോയ് രംഗത്ത്. തന്റെ ഫേസ്ബുക്ക് പേജിലൂടെയാണ് 2009ലെ എറണാകുളം മണ്ഡലത്തിലെ ഇടത് സ്ഥാനാര്ത്ഥി രംഗത്ത് വന്നത്. കേന്ദ്രമന്ത്രി ഉയര്ത്തുന്ന വിമര്ശനവും പരാതിയും കൊച്ചുകുട്ടികളെ പോലെ ആണെന്നും അവര് പരിഹസിക്കുന്നു. മണ്ഡലത്തില് പ്രമുഖര് ആരെങ്കിലും വോട്ട് ചെയ്യുന്നുണ്ടെങ്കില് അത് അന്വേഷിച്ചു അവരെ കാണാന് പോകും.
ഫേസ്ബുക്കില് സിന്ധു ജോയ് കുറിച്ചതിന്റെ പൂര്ണരൂപം
എറണാകുളത്തു എന്.ഡി.എ സ്ഥാനാര്ത്ഥി അല്ഫോന്സ് കണ്ണന്താനം നടന് മമൂട്ടിക്ക് എതിരെ ഉയര്ത്തിയിരിക്കുന്ന വിമര്ശനം ബാലിശവും പ്രതിഷേധാര്ഹവുമാണ്. സാധാരണഗതിയില് പോളിങ് തുടങ്ങുമ്പോള് തന്നെ സ്ഥാനാര്ത്ഥി വോട്ട് രേഖപ്പെടുത്തും. തുടര്ന്ന് മറ്റു പോളിങ് സ്റ്റേഷന്കളിലേക്കു പോകും. മണ്ഡലത്തില് പ്രമുഖര് ആരെങ്കിലും വോട്ട് ചെയ്യുന്നുണ്ടെങ്കില് അത് അന്വേഷിച്ചു അവരെ കാണാന് പോകും. രണ്ടായിരത്തി ഒന്പതില് ഞാന് മത്സരിച്ചപ്പോഴും ഇതാണ് ചെയ്തത്. പനമ്പള്ളി നഗറില് വോട്ട് ചെയ്തു കഴിഞ്ഞു ‘സിന്ധു ജോയ് നല്ല സ്ഥാനാര്ത്ഥി’ ആണെന്നൊക്കെ അദ്ദേഹം മാധ്യമങ്ങളോട് പറഞ്ഞിരുന്നു. ഇത്തവണ പി.രാജീവും ഹൈബി ഈഡനും ആ ബൂത്തില് പോയി. രണ്ടു പേരും മികച്ച സ്ഥാനാര്ത്ഥികളാണെന്നു മമ്മൂക്ക പറയുകയും ചെയ്തു. അതില് എന്താണ് ഇത്ര തെറ്റ്? അല്ഫോന്സ് കണ്ണന്താനം മോശം സ്ഥാനാര്ത്ഥി ആണെന്ന് മമ്മൂക്ക പറഞ്ഞോ?. തിരഞ്ഞെടുപ്പ് പിറ്റേന്ന് ഒരു വിവാദം ഉണ്ടാക്കണമായിരുന്നെങ്കില് അത് ഈ മഹാനടന്റെ പേരില് വേണമായിരുന്നോ? ഈ പ്രസ്താവനയിലൂടെ താങ്കള് കൂടുതല് ചെറുതാവുകയാണ്!
