എന്‍എസ്എസിന് വേണ്ടി കക്കൂസ് വെട്ടാന്‍ പോയാലും അഭിമാനമെന്ന പ്രസ്താവനയില്‍ ഉറച്ചുനില്‍ക്കുന്നുവെന്ന് പ്രിയ വര്‍ഗീസ്. ഫേസ്ബുക്ക് പോസ്റ്റിലാണ് എന്‍എസ്എസിന് വേണ്ടി കുഴിയല്ല കക്കൂസ് വെട്ടാന്‍ പോയാലും അഭിമാനം എന്ന പ്രസ്താവനയില്‍ നിന്ന് ഒരിഞ്ച് പോലും പിന്നോട്ടില്ലെന്ന് പ്രിയ വര്‍ഗീസ് വ്യക്തമാക്കുന്നത്.
അധ്യാപന പരിചയവുമായി ബന്ധപ്പെട്ട ഹൈക്കോടതി പരാമര്‍ശത്തിന് പിന്നാലെ ഫെയ്സ്ബുക്ക് പോസ്റ്റിട്ട പ്രിയ വര്‍ഗീസ് അത് പിന്‍വലിച്ചിരുന്നു. ഇതില്‍ വ്യക്തതയുമായാണ് പുതിയ ഫെയ്സ്ബുക്ക് പോസ്റ്റ്. പോസ്റ്റ് പിന്‍വലിച്ചത് കോടതിയലക്ഷ്യമെന്ന് മാധ്യമങ്ങള്‍ റിപ്പോര്‍ട്ട് ചെയ്തതിനെ തുടര്‍ന്നാണെന്നും പോസ്റ്റിലുണ്ട്.
‘പിന്‍വലിച്ചത് കോടതിയലക്ഷ്യം എന്ന് മാധ്യമങ്ങള്‍ റിപ്പോര്‍ട്ട് ചെയ്തപ്പോഴാണ്. സാങ്കേതികമായിട്ടാണെങ്കിലും അങ്ങിനെ വരരുതല്ലോ. ഭരണഘടനയും കോടതികളും കൂടി ഇല്ലാതായാല്‍ പിന്നെ എന്തുണ്ട് ഇന്നത്തെ ഇന്ത്യയില്‍ ബാക്കി. അതുകൊണ്ട് മാത്രം. നാഷണല്‍ സര്‍വീസ് സ്‌കീമിനു വേണ്ടി കുഴിയല്ല കക്കൂസ് വെട്ടാന്‍ പോയാലും അഭിമാനം എന്ന പ്രസ്താവനയില്‍ നിന്ന് ഒരിഞ്ച് പോലും പിന്നോട്ടില്ല. Not me but you എന്ന എന്‍. എസ്. മോട്ടോ മലയാളത്തില്‍ ‘വ്യക്തിയല്ല സമൂഹമാണ് പ്രധാനം’ എന്നാണ് ഉപയോഗിക്കാറുള്ളത് എന്ന് പോലും അറിയാത്ത മാധ്യമ വാര്‍ത്തകള്‍ തന്നെയാണ് എന്‍എസ്എസ് ന്റെ പ്രസക്തിയെ അടിവരയിട്ട് ഉറപ്പിക്കുന്നത്. എന്‍എസ്എസ് പ്രവര്‍ത്തനപരിചയമില്ലാത്ത വിദ്യാഭ്യാസം എത്ര ശുഷ്‌കമായിരിക്കും എന്നതിന് അതിലും വലിയ ഉദാഹരണം വേണോ’, പ്രിയ വര്‍ഗീസ് പറയുന്നു.
